Një ikje e befasuese nga politika me mesazhin: Shqipëria, plot shpresë!

Një tjetër akt dorëheqjeje dhe krejt e papritur në raport me personin që e ka bërë, ka ndodhur në politikën shqiptare.

Lefter Koka, ish-kryebashkiak i Durrësit, njëherësh ish-ministër Mjedisi në “Rama 1” nga LSI, me mandate deputeti në xhep marrë nën siglën e PS-së më 25 prill, ka vendosur ta dorëzojë dhe të largohet nga politika aktive.

Psenë, nuk e ka bërë me dije. Në letrën publike thotë shumkë gjëra veç asaj që duhet të ketë qenë një shkak jo dhe aq parimor.

“Dy dekada më parë me përgjegjësi të lartë publike, mora përsipër të garoja për të qenë zëri qytetarëve durrsakë.

Në këtë rrugëtim plot sfida, suksese e padiskutim dhe dështime, pata fatin të dëshmoj fuqinë e besimit, si dhe dinjitetin e njerëzve që punojnë çdo ditë me ndershmëri dhe përkushtim për një të ardhme më të mirë.

Në morinë e sfidave me të cilat ky rrugëtim të përball është gjithmonë e vështirë të ndalesh një moment dhe të vlerësosh se kur është koha e duhur për të mbyllur një cikël.

Sot është dita që rrugëtimin tim politik, ta vijojnë ata mijëra bashkëpunëtorë të mitë, që më bënë fitues për vite me rradhë dhe që mbase nuk kam mundur asnjëherë t’i falenderoj sa duhet. Sot, e ardhmja u përket atyre!

Me këtë vendim timin, është njohur institucionalisht si Komisioni Qendror i Zgjedhjeve ashtu edhe Kuvendi i Shqipërisë.

Së fundmi, mirënjohje të madhe për mundësinë, besimin dhe privilegjin e jashtëzakonshëm që më është dhënë t’i shërbej me përkushtim qytetit, vendit dhe njerëzve që dua!

Shqipëria është padyshim sot një vend më i mirë se dje, është vendi plot dritë shprese që na përket të gjithëve”, shkruan politikani durrsak. /sarandacity.al/