Ky muaj si dhe marsi, për ata që merrem me kultivim kanabisi, është muaji i mbjelljes së kësaj bime të ndaluar me ligj. Por kjo vetëm me fara në kubikë e në ambiente të mbyllura.
Ndaj, nga fakti se vitin e kaluar, një nga problematikat e hasura në polici ishte kultivimi i drogës në sera e godina të pabanuara, këtë të premte, Kryepolici Nano ka urdhëruar vartësit të nisin një operacion për kontrollin e territorit.
Në urdhrër thuhet se operacioni do të kryhet çdo ditë në të gjitha qarqet, nga ora 9:00 deri në orën 16:00.
Në terren do të dalin edhe punonjësit e sektorëve dhe seksioneve të tjera dhe jo vetëm ata të narkotikëve.
Sipas urdhrit, kontrollet do të zhvillohen në banesa, objekte të mbyllura, sera, depo, magazina, tunele, ish-reparte ushtarake, ish depot e rezervave shtetërore, shtëpi të braktisura, stane e stalla. Për policinë këto ambiente shfrytëzohen nga individë apo grupe kriminale për kultivimin e bimëve narkotike apo përgatitjen e mbjelljes së fidanëve të drogës.
Për të mos dekonspiruar operacionin, Nano ka vendosur që kontrollet nuk do të kryhen nga oficerët e qarkut.
Kujtojmë se ditë më parë, një ambient të braktisur në Shënvasi, ishte shndërruar në parcel të mbyllur kanabisi. /sarandacity.al/
