Bashkia e Sarandës i ka dedikuar një nekrologji nderuese Luan Ahmetit, një prej ikonave të arsimit ndër vite në Sarandë, i cili u ndaj nga jeta një ditë më parë.
“Ndarja nga jeta e Luan Ahmetit, është një humbje për gjithë arsimin në Sarandë. Më shumë se pesë dekada të jetës së tij ai ia dedikoi edukimit të brezave të mijra nxënësve në Sarandë, Ksamil e Mursi.
Nga shkolla ‘Adem Sheme’ tek ‘9 Tetori’, nga Shkolla e Mesme Ksamil, tek ajo e Mursisë, nga Gjimnazi ‘Hasan Tahsini’ tek Shkolla jopublike ‘Dea 2001’, që e themeloi dhe e formatoi sipas vizioneve të veta, ku në 20 vitet e fundit, e bëri konkurruese në shkallë vendi në sistemin e arsimit jopublik.
Kontribuitet e Luan Ahmetit janë të kudogjendura: e nisi nga një mësues i thjeshtë i fizikës, për t’u dalluar si drejtues vizionar i disa shkollave dhe Drejtor i Zyrës së Arsimit të Rrethit në Sarandë.
Ai do të mbahet mend si arsimtar krijues, si drejtues rezultativ dhe si intelektual e qytetar model i Sarandës.
Ai gëzonte simpatinë dhe respektin maksimal të kolegëve, të mijëra nxënësve të tij dhe të komunitetit.
Me punën, profesionalizmin, ndershmërinë, vlerat më të mira humane dhe familjen e nderuar, Luan Ahmeti plotëson figurën e një personaliteti të Sarandës, që do të na mungojë”, shkruan Bashkia. /sarandacity.al/
