Furgoni nga rrëzimi i të cilit humbën jetën 5 persona në Qafën e Muzinës, aksident i ndodhur pasditen e 26 gushtit, ka qenë me probleme në dokumentacion dhe nuk plotësonte asnjë kriter për të bërë linjën Sarandë – Tiranë me pasagjerë.
Kjo u tha nga Blendi Gonxhe, drejtori i Transportit Rrugor.
“Një shërbim i pasiguruar, i pakolauduar, i pa kontrolluar dhe i palicencuar nuk të thotë as vendos rripin para, as ulu në sediljen e dytë, as kujdes valixhet. Aksidenti më i rëndë që ndodhi në jug këtë verë në Qafën e Muzinës, nuk ndodhi edhe aq nga rrëzimi, nga lartësia.
Aksidenti ndodhi me një mjet të bashkisë së Finiqit që nuk e kishte fare të drejtën për të bërë transport nga Tirana në Sarandë dhe nga pesha që kjo makinë kishte në bagazhin e vet që ishte krejtësisht e pa lejuar që të ishte në atë lloj forme.
Dhe kjo shkaktoi një aksident. Natyrisht që do të ishte një aksident rënia nga rruga, por kjo shkaktoi një aksident më të rëndë që mori gjithë ato jetë njerëzish. Ishte një automjet, pa bileta, jashtë linje dhe itinerari”, tha Gonxhe në ABC Neës.
Dalja e furgonit nga rruga ndodhi pas përplasjes me Land Rover. Kujtojmë se mes jetëhumbjeve qe dhe shoferi i furgonit, Bardhi Proda. /sarandacity.al/
