“U kam mbajtur gjithë jetën dhe ju kam dhënë gjithçka. Tani kam ngelur pa asnjë gjë dhe tek buka e gojës. Më ndihmoni ju”. Kjo ka qenë kërkesa për ndihmë e bërë nga një prind i moshuar i moshës 80-vjeçare drejtuar fëmijëve të tij, të cilët jetojnë në periferinë e Trevizos në Itali.
Në kundërshtim me çdo logjikë njerëzore, e madje edhe me urdhëresat hyjnore, të cilat thonë ‘ndero nënën e babanë’, dy fëmijët i kanë kthyer krahët duke i dhënë përgjigjen “Bëj si të bësh”.
Duke mos ditur se si të sillet e duke mos parë asnjë rrugëdalje, i moshuari i është drejtuar avokatit Fabio Capraro, për ta këshilluar në lidhje me rastin e tij. Kështu ai ka zbuluar se ‘të nderosh babanë e nënë’, përveç se një detyrim etik e fetar, është edhe një rregull e detyrim ligjor.
Ai ka kallëzuar dy fëmijët, të cilëve u ka kërkuar në gjykatë të përgjigjen sa i takon ushqimit dhe plotësimit të nevojave minimale, të cilat parashikohen nga Kodi Civil dhe ai Penal në Itali.
E megjithatë, i moshuari nuk kërkonte shumë. “Kam një pension prej 600 eurosh në muaj, por 300 prej tyre i harxhoj me qiranë. Me pjesën që më ngelet, nuk arrij as deri në mes të muajit. Më jepni një dorë ndihmë. Mjafton që secili prej jush të më japë rreth 80 euro në muaj. Me 150/160 euro më shumë e arrij fundin e muajit dhe paguaj të gjitha shpenzimet, edhe ilaçet”,- thotë i moshuari, të cilit i takojnë me ligj këto para, e jo më moralisht. /tesheshi.com/
