Kapur pas 30 vitesh arrati: kush është bosi mafioz Messina Denaro?

Policia italiane arrestoi të hënën Matteo Messina Denaro, bosi më i kërkuar i mafias në vend, i cili ishte në arrati për 30 vjet.

Kush është Matteo Messina Denaro?

Messina Denaro u akuzua si një vrasës i pamëshirshëm, dhuna e të cilit kontribuoi në reputacionin e përgjakshëm të Cosa Nostra.

“Mund të mbushja një varrezë me njerëzit që vrava vetë”, dyshohet se mburrej ai.

Kjo është e pamundur të konfirmohet, por flet për legjendën që e rrethon.

I njohur si “Diabolic” sipas personazhit të librit komik, ai ishte lideri i padiskutueshëm i Cosa Nostra-s në provincën perëndimore siciliane të Trapanit.

Por pushteti i tij u zgjerua më tej, duke përfshirë kryeqytetin e Siçilisë, Palermon, ku u arrestua.

Denaro është një adhurues i orëve Rolex, veshjeve të stilistëve, komikeve dhe lojërave video, si dhe ka një reputacion si playboy.

Një herë ai u shfaq në kopertinën e një reviste italiane me syze të errëta. Ai dukej si një yll rock, por lista e viktimave të tij ishte e gjatë dhe krimet për të cilat akuzohej ishin të tmerrshme.

Për çfarë akuzohet?

I lindur më 26 prill 1962 në Castelvetrano në jugperëndim të Siçilisë, Denaro u rrit në zemër të krimit të organizuar.

Babai i tij, Don Ciccio, ishte kreu i një klani lokal dhe kumbari i tij, i cili mori pjesë në pagëzimin e tij, ishte gjithashtu një anëtar i mafies. Konfliktet e tij të para me ligjin nisën në vitin 1989 kur ai mori pjesë në një përleshje të përgjakshme mes dy klaneve.

Atë vit, ai u akuzua për vrasjen e Nicole Consales, një pronare hoteli, e cila iu ankua një punonjësi se i kishte “këta mafiozët e vegjël nën këmbë”. Por ajo punonjëse ishte e dashura e Messina Denarës.

Në vitin 1992, ai ishte pjesë e një grupi mafioz të dërguar në Romë në përpjekje për të vrarë gjyqtarin antimafia, Giovanni Falcone.

Grupi u tërhoq përfundimisht nga Toto Riina, bosi i Corleone-s i njohur si “Bisha”, i cili vendosi të merrte një qasje tjetër. Falcone u vra në një shpërthim makine pranë Palermos më 23 maj 1992.

Vetë Messina Denaro ka qenë i pamëshirshëm gjatë gjithë karrierës së tij.

Në korrik të vitit 1992, pasi dyshohet se mori pjesë në vrasjen e Vincenzo Milazzo-s, kreut të klanit rival Alcamo, ai u akuzua se mbyti partneren e tij, e cila ishte tremuajshe shtatzënë.

Dy trupa u varrosën në natyrë.

Si kreu i klanit Castelvetrano, ai ishte aleat me klanin Corleonesi, i përjetësuar në serinë e filmave “The Godfather”.

Pasi Riina u arrestua në janar 1993, hetuesit thonë se Messina Denaro vazhdoi strategjinë e tij të brutalitetit të përgjithshëm, duke ofruar mbështetje logjistike për bombat në Firence, Milano dhe Romë, ku atë vit që vranë dhjetë njerëz dhe plagosën rreth 100.

Gjykata vendosi se në nëntor 1993 ai ishte një nga organizatorët e rrëmbimit të 12-vjeçarit të atëhershëm Giuseppe Di Matteo, babai i të cilit dëshmoi për vrasjen e Falcone-s.

Në një nga incidentet më famëkeqe të Cosa Nostra-s, një djalë u mbajt për 779 ditë përpara se të mbytej dhe trupi i tij u tret në acid.

Si e shmangu arrestimin për kaq kohë?

Messina Denaro u zhduk nga publiku në mesin e vitit 1993, duke filluar atë që rezultoi të ishte një arratisje gati 30-vjeçare nga akuzat për lidhje me, vrasje, vjedhje dhe posedim eksplozivësh.

Në 1994 dhe 1996, deklaratat e mafiozëve që më vonë u bënë dëshmitarë hodhën pak dritë mbi rolin e tij brenda Cosa Nostra-s.

Në vitin 2000, pas atij që njihet si gjyqi Maxi kundër mafies siciliane në Trapani, në të cilin u dënuan qindra të pandehur, ai u dënua në mungesë me burgim të përjetshëm.

Si i shpallur në kërkim, Messina Denaro e zhvillonte biznesin e tij duke komunikuar me pseudonimin “Alessio” nëpërmjet sistemit “pizzini”, në të cilin mesazhet liheshin në copëza letre.

Vendndodhja dhe aktivitetet e tij në atë kohë ishin subjekt i thashethemeve intensive, duke përfshirë se ai kishte bërë një operacion plastik për të ndryshuar pamjen e tij.

Ai kishte shumë burime të ardhurash, nga trafiku i drogës e deri te lojërat e fatit, si në Itali ashtu edhe jashtë saj.

Në vitin 2015, prokurorja italiane në gjurmët e tij, Teresa Principato, tha se ai i kishte shpëtuar arrestimit për kaq shumë kohë ndoshta sepse ishte i mbrojtur “në një nivel shumë të lartë”. Ajo nuk tha nëse ishte Cosa Nostra, politikanë apo institucione.

“Kemi konfirmim për praninë e tij në Brazil, Spanjë, Britani të Madhe, Austri”, tha ajo për Il Fatto Quotidiano.

“Ai udhëton për biznes të nivelit jashtëzakonisht të lartë dhe kthimi i tij në Siçili është i parregullt dhe gjithnjë e më i rrallë.”

Në vitin 2020, disa bashkëpunëtorë të Messina Denarës u arrestuan, duke shtrënguar rrjetin rreth tij.

Në tetor të atij viti, ai u dënua përsëri në mungesë për rolin e tij në vrasjen e Falcone-s.

Si u kap?

Gjenerali i karabinierëve Pasquale Angelosanto, i cili drejton skuadrën e operacioneve speciale të policisë, tha se shëndeti i Messina Denaro i ndihmoi hetuesit ta gjenin atë.

I arratisuri ka shkuar për trajtim në një qendër mjekësore.

“Gjithçka çoi deri sot kur ai do të vinte për disa analiza dhe trajtim” në klinikë, tha Angelosanto të hënën.

Autoritetet nuk thanë se për çfarë po trajtohej, por ai u kap në klinikën La Maddalena në Palermo, një institucion mjekësor i njohur për trajtimin e pacientëve.

Gjatë një konference për shtyp në mbrëmje, autoritetet thanë se trajtimi i Messina Denaro mund të vazhdojë në repartin e burgut të spitalit.

Hetuesit thanë se ai nuk ishte i armatosur dhe ishte i veshur si një pacient tipik klinik, megjithëse mbante një orë me vlerë të paktën 30,000 euro.

“Ai nuk ofroi rezistencë,” tha koloneli i Karabinierëve, Lucio Arcidiacono. /sarandacity.al/