Së shpejti, në Sarandë do të organizohet eventi “Yje në Lëkurs”.
Është një spektakël pop-classic, cili vjen për herë të parë për publikun i realizuar në një kala.
Kalaja e Lëkursit, është përzgjedhur për të mirëpritur artistët të cilët do të ngjiten në skenën e gurtë për të përshëndetur jo vetëm publikun e partnerët që e kanë mundësuar këtë spektakël, por edhe turistët që do të vizitojnë qytetin e Sarandës.
Qendra Guga Production, është ideatore e këtij produksioni. Ajo ka ftuar Bashkinë Sarandë për të qënë partner në spektaklin “Yje në Lëkurs” dhe është pritshme është që Bashkia Sarandë, të jetë mbështetëse në këtë produksion që do të ngjitë artistë të klasit të parë në skenën e kalasë së Lëkursit, informon zëdhënësi Thoma Nika.
Do jenë emrat e mëdhenj të skenës shqiptare si Kastriot Tusha, Mariza Ikonomi, aktoria Ema Andrea, soprano nga filarmonia e Kosovës Adelina Paloja, baritoni Armando Likaj, instrumentistë e balerinë, të cilët do të mblidhen në Sarandë, nën moton “Yje në Lëkurs”
Përse “Yje në Lëkurs”? Sepse spektakli do të zhvillohet nën qiell të hapur dhe sepse artistët e këtij spektakli janë yje të skenës shqiptare, shkruan Nika.
Për rreth dy orë, spektakli do të “shtegtojë” në treva të ndryshme të Shqipërisë por edhe duke prekur Greqinë, Italinë, Kosovën me art e me muzikë, shoqëruar nga orkestra filarmonike e cila është e përbërë prej 40 instrumentistësh.
Gjithcka do të intepretohet live në skenë, për të sjellë sa më shumë emocione për publikun, ku nuk do të mungojnë edhe duetet por edhe kolazhet e ndryshme që artistët do të sjellin me njëri-tjëtrin. Këngët do të jenë të riorkestruara dhe të sjellura ndryshe për spektatorin e telespektatorin i cili do të ketë mundësinë të ndjekë këtë program.
E gjithë kjo pritet të ndodhë më 17 korrik. /sarandacity.al/
