“Thoma Filipeu”, një ndër veprat simbol ujitëse të komunizmit në Sarandë, nuk do vijojë më të rrijë “këmbëpërpjetë”, siç dikush e ka përshkruar kështu.
E dëmtuar nga një mot i rënduar në dimër, ajo ka nisur të rehabilitohet, për t’u kthyer siç ka qenë, ndoshta dhe më cilësore, sigurisht për të qenë edhe efektive e jo thjesht muzeale.
Sipas njoftimit që jep Bashkia e Finiqit, në territorin në të cilin ndodhet urë-kanali ujitës me famë, puna rehabilituese nuk do të zgjasë shumë.
“Shembja e urës në kanalin ′Thoma Philipeu’ ishte një goditje e madhe për fermerët në komunën tonë. Nga fundi i janarit kur problemi doli, kryetari i Bashkisë së Finiqit e ngriti atë si një çështje me përparësi dhe kërkoi burime për ta rindërtuar atë.
Pas shumë studimesh dhe veprimesh, Drejtoria e Përgjithshme e Ujit miratoi shumën prej 187 milion lekë të vjetra.
Studimet u kompletuan me veprime intensive, u tejkalua burokracia dhe u zhvillua ankandi.
Puna filloi në fillim të qershorit dhe shpresojmë të përfundojë në korrik”, është postimi i bërë nga ana e Bashkisë Finiq në FB, duke e shoqëruar me pamjet përkatëse. /sarandacity.al/
