Profesori në Universitetin e Prishtinës, Milazim Krasniqi në një postim të tij në rrjetin social Facebook, ka kujtuar 7 prillin e vitit 1939 kur Shqipëria u pushtua nga fashistët. Sipas tij kjo ditë do të duhej të shënohej me aktivitete politike, akademike, mediale, kulturore dhe shoqërore por kjo sot as që ishte në rend dite ka shkruar krasniqi. Ja postimi i plotë i Milazim Krasniqit:
7 Prilli 1939 është dita kobzezë e pushtimit fashist të Shqipërisë. Një ditë që do të duhej të shënohej me aktivitetet politike, akademike, mediale, kulturore dhe shoqërore. Por, sa i pashë mediet e sotme, sa i pashë agjendat e sotme politike dhe të tjerat, kjo përkujtesë nuk ka qenë në rend dite fare. (Të paktën ta botonin poezinë tronditëse të Petro Markos, bre!) Këtij përkujtimi në Shqipëri ia kanë zënë vendin raportimet për Mark e Arben Frrokun, Tom Doshin e Durim Bamin e s’mbetet vend për Musolinin, V.Emanuelin e Çianon. Sa poshtë po e ulim veten, duke e injoruar historinë, prej së cilës do të mund të buronte fuqia jonë edhe për sot! ‘’, ka shkruar Prof. Milazim Krasniqi.
