Ndër lagunat më të njohura të Shqipërisë, është dhe ajo e Patokut.
Kush thoshte dikur se Laçi ka vetëm Superfosfatin, merrte përgjigjen se jo, ka dhe plazhin e Patokut, pasi në vijë të drejtë nga ish-qyteti industrial është afro 10 km (nga autostrada vetëm 5 km). Dikur aty kishte kabina dhe bëhej plazh familjar.
Laguna e Patokut ka një vijë bregdetare prej 8 km, është ranore me shenja të dendura erozioni dhe ndryshime të shpeshta të pozicionit të vijës bregdetare. Për këtë arsye, një fshat i dikurshëm i quajtur i pushimeve, tani ndodhet ne det si shkak i derdhjes së dy lumenjve Mat dhe Ishëm dhe gërryerjes së madhe e krijuar në vitet e fundit.
Laguna zë një sipërfaqe prej 400 hektarë dhe të ndjell ta eksplorosh natyrën e atyshme të përbërë nga llo-lloj pemësh e bimësh. Po ashtu, aty zihet dhe gatuhet një peshk i disa varianteve, si qejfulli, levreku, gjuza, çafrra, ngjala etj.
Aty ka qenë dhe qenë dhe rezervati i njohur i Fushë – Kuqes për dhelpra dhe kunadhe, por që tashmë nuk funksionon. Frekuentimin e ka të shpeshtë, sidomos tani në pranverë e më pas në kohë plazhi, ku dynden vendas, por dhe të huaj, për pushime dhe plazh.
E veçantë aty është udhëtimi me varkë në një distancë prej 2.5 km, për të dalë në grygderdhjen e lumit Mat, ku të duhet të përshkosh një rrugë e cila kalon në një grykë e rrethuar me kallamishte, ku të duket sikur po endesh në ndonjë xhungël. Eshtë vërtet një përjetim i rrallë.
Le ta themi se “parajsën” e kësaj lagune e ka cënuar jo pak dëmtimi disavjeçar në resurset natyrore, por jo çdo gjë ka shkuar afër fundit, derisa për shkak të interesit të madh është menduar dhe për rrugën, e cila është shtruar së fundi.
Ajo që dhemb më shumë është humbja e gjallesave detare nga gjuetia pa kriter. Por megjithatë, pejsazhet e rralla të bregdetit, ta shtojnë frymëzimin dhe entuziazmin. Mjaft të dëgjosh përshtypjet e turistëve të ndryshëm, të cilët shprehen me superlativa për këtë perlë natyrore.
Përgatiti Ahmet Zani-tesheshi.com
