Gruaja që pretendonte se kishte lindur presidentin rus Vladimir Putin, ka vdekur pa para në fshatin Meteki, Gjeorgji.
Siç raporton Daily Mail, Vera Nikolaevna Putina nuk pushoi së thënë sa ishte gjallë se ishte nëna e të fuqishmit të Kremlinit. Por ai i kishte kthyer shpinën asaj…
Ajo këmbënguli për vite se Putin ishte djali i saj, të cilin u detyrua t’ua dërgonte gjyshërve të tij me urdhër të njerkut të tij.
Vera fillimisht pretendoi në vitin 1999 se ajo ishte nëna e Putinit, ndërsa Putin e mohoi këtë duke shkruar në autobiografinë e tij se ai kishte lindur dhe rritur në Shën Petersburg. Ai gjithashtu deklaron se ishte djali i vetëm i mbijetuar i një punëtoreje, Maria, dhe babait të tij, Vladimir Putin, një punëtor fabrike dhe ish-ushtarak që kishte shërbyer në policinë sekrete të Jozef Stalinit gjatë Luftës së Dytë Botërore. Prindërit e tij, sipas fjalëve të presidentit rus, vdiqën nga kanceri në fund të viteve 1990.
Vera Nikolaevna Putina lindi më 6 shtator 1926 në Ochiorsk Oblast, Rusi. Ajo pretendoi se ndërsa studionte për Inxhinieri Bujqësore në Universitet, ra në dashuri me inxhinierin Platon Privalov, mbeti shtatzënë dhe më vonë zbuloi se i dashuri i saj ishte i martuar dhe synonte t’i vidhte foshnjën sepse gruaja e tij ishte shterpë.
Ajo pretendoi se lindi djalin e saj, me nofkën “Vova”, më 7 tetor 1950, saktësisht dy vjet para datës zyrtare të lindjes së Putinit dhe se e rriti atë në fshatin e varfër Meteki, një orë me makinë nga kryeqyteti i Gjeorgjisë, Tbilisi. Një mësuese fshati, Sura Gabinashvili, pohoi në një intervistë të vitit 2008 me gazetën britanike Daily Telegraph se ajo i dha mësime të gjuhës ruse Putinit. “Atij i pëlqenin mitet ruse dhe gjuha ruse ishte lënda e tij e preferuar. I pëlqente edhe peshkimi dhe mundja”, kishte thënë ai në atë kohë.
Kur Vera u martua me ushtarin gjeorgjian Giorgi Osepakhvili, me të cilin kishte më shumë fëmijë, ai i kërkoi asaj të hiqte dorë nga djali i saj i parëlindur, ndaj dhe ajo e dërgoi fëmijën në moshën 10-vjeçare për të jetuar me prindërit e saj në Rusi. Një vit më vonë, gjyshi i fëmijës vendosi ta çonte në një jetimore.
Prindërit që e adoptuan në Shën Petersburg, siç tha Vera, ishin të dy 40 vjeç kur ai pa dritën e diellit. Çifti rus vendosi të birësonte pasi humbi të dy djemtë e tyre në fëmijëri.
Vera kishte mësuar se djali i saj ishte bashkuar me KGB-në (ish-shërbimi sekret rus), por mendonte se nuk do ta shihte më. Megjithatë, në vitin 1999, duke parë lajmet në televizion që përmendnin kryeministrin e ri të Rusisë, ajo e njohu menjëherë djalin e saj, Vladimir Putin, sepse, siç kishte thënë ajo, “ecte si rosë”.
Gjatë gjithë kohës që Vera pretendonte se ishte nëna e Putinit, Kremlini mbajti një heshtje të ashpër për këtë çështje.
Ndoshta nuk është rastësi që dy gazetarë që u përpoqën ta takonin atë vdiqën në mënyrë misterioze. Artyom Borovi, një kundërshtar i Kremlinit, i cili në atë kohë po përgatiste një dokumentar për fëmijërinë e Putinit, u vra më 9 mars 2000 në një aksident avioni në Aeroportin Ndërkombëtar Sheremetyevo të Moskës. I dyti, italiani Antonio Russo, u vra më vonë atë vit ndërsa mbulonte luftën e dytë të Rusisë në Çeçeni.
Nga ana e tij, historiani amerikan me origjinë ruse Yuri Felstinsky ka argumentuar se pretendimet e Vera Putin mund të shpjegojnë përkushtimin e Vladimir Putinit ndaj KGB-së (dhe pasuesit, FSB-së): “I privuar nga rehatia prindërore në fëmijërinë e tij, Putini iu drejtua KGB-së për të gjetur një familje të re”, pohon ai.
Burime në Gjeorgji konfirmuan për gazetën britanike The Sun se gruaja ka vdekur nga pleqëria në Tbilisi dhe është varrosur në fshatin e saj, Meteki, të martën e kaluar.
Edhe pse gjeorgjianja kishte ofruar t’i nënshtrohej një testi të ADN-së për të vërtetuar se ajo po thoshte të vërtetën, Kremlini i kishte hedhur poshtë pretendimet e saj, me ish-zëdhënësin e Putinit, Dmitry Peskov, duke thënë: “Kjo histori nuk është e vërtetë. Nuk ka asnjë lidhje me realitetin”. /sarandacity.al/
