A mund të jetë ky ministër Turizmi në Shqipëri?

Për njohësin e turizmit Auron Tare, Altin Prenga është apo duhej të ishte ministri i vërtetë i Turizmit në Shqipëri.

E thënë kjo metaforikisht një natë më parë në Open, Tare e ka ripërsëtitur sërish me një shënim në FB, ku si qëllim ka të promovojë atë çfarë i njohuri si Alti i Mrrizit ofron si model turizmi.

“A mund të jetë ministër i Turizmit Altini i Mrizit?

Sot në mëngjez, disa miq të mi më shkruanin nëse kisha bërë humor tek debati i mbrëmshëm në Top Channel me propozimin tim. 

Në fakt JO. Mendoj se Altin Prenga apo Altini i Mrizit, është udhërrëfyesi më i mirë që Shqipëria mund të ketë në gjetjen e shtegut turistik  të së ardhmes. 

Altini i Mrizit, me modelin e tij ia ka dalë të shndërrojë një zonë dikur kamp përqëndrimi në një simbol të turizmit të qëndrueshëm.

Integrimi i komunitetit të asaj zone në atë që Mrizi i Zanave është sot, vlen shumë më tepër se dhjetra projekte që gëlltisin miliona euro dhe që lënë pas ca fletepalosje, strategji të pazbatueshme apo konsulentë të superpaguar.

Altini i Mrizit është në fakt një ministër i suksesshëm turizmi, një model që shumë nga ne i referohemi kur duam të tregojmë se ku mund të shkoje turizmi shqiptar.

Altini ka bërë atë që shumë ministra Turizmi që kanë ardhur dhe kanë iku pa lënë asnjë shenjë nuk mund të kuptojne dot. Turizmin e identitetit, një turizem që fatkeqësisht burokratët tanë nuk po arrijnë ta kuptojnë.  

Prandaj, ajo që thashë mbrëmë ka shumë kuptim.

Shqipërisë i duhet një ministër Turizmi që në rradhë të parë kupton se nëse do të duam të jemi një mundësi rajonale turistike, duhet të ruajme dhe të zhvillojmë IDENTITETIN”, shkruan Tare. /sarandacity.al/