Enkelejd Alibeaj, kryetar i komanduar i një prej dy gjysmave të PD-së, ka bërë dhe njëherë fakt të kryetar që ai e jo Berisha, është në krye të kësaj force. Si? Duke zgjedhur dy kandidatura për Lokalet e 14 majit.
Bëhet fjalë për Vaun e Dejës dhe Patosin, ku në garë për këto dy bashki do të jenë dy zonja, të nderuara sipas PD-së “Alibeaj”, pasues i Bashës së dorëhequr.
“Klomentina Drini është kandidatja që do të përfaqësojë PD në zgjedhjet vendore te 14 majit në Vaun e Dejës. Ajo ka lindur dhe jeton së bashku me bashkëshortin dhe vajzën në Vaun e Dejës. Zonja Drini është pasardhëse e një familje të nderuar dhe që është persekutuar gjatë nga regjimi komunist.
Gjatë viteve të fundit kandidatja e PD ka qenë ne pozicione të larta drejtimi në fushën e administrimit në biznese private por dhe në administratën lokale. Angazhimi i saj është vlerësuar edhe nga organizata të ndryshme ndërkombëtare duke përfshirë dhe punën e admirueshme që ka bërë për komunitetin e zonës.
Ndërkohë, për Patosin do të jetë në garë mësuesja Pranvera Rizai. Zonja Rizai rrjedh nga një familje e nderuar dhe e persekutuar gjatë regjimit komunist. Prej vitesh ajo mban postin e kryetares së LDG të Patosit.
Është anëtare themeluese e degës së PD në Patos dhe njihet për kontributin e saj edhe si anëtare e këshillit bashkiak. Prej shumë vitesh zonja Rizai ushtron profesionin e mësueses dhe së fundmi është angazhuar pranë shkollës ‘Meleq Gosnishti’, Patos. Ajo është e martuar dhe nënë e dy djemve”, thuhet në profilin e tyre.
Kështu, me këtë hap, është qartësuar dhe njëherë fakti se vështirë të ketë ndonjë PD të bashkuar.
Alibeaj është ndër ata që po qëndron stoik ndaj Berishës, pasi e ka sulmuar dhe në të shkuarën e tij si komunist. /sarandacity.al/
