Anketa: 56,4 % e udhëtimeve drejt Shqipërisë, për pushime

Shqipëria tërhoqi gjatë vitit 2020, një fluks disa herë më të shtuar të udhëtimeve të turistëve të huaj dhe vizitorëve, jo vetëm për pushime, por edhe për biznes dhe kohë të lirë, krahasuar me vitin 2019.

Statistikat e përpunuara nga anketa “Pushime dhe Udhëtime” e Institutit të Statistikave vlerësojnë se më 2020, udhëtimet e kryera në Shqipëri për qëllime “Pushime dhe kohë të lirë” dhe “Arsye të tjera” janë rritur përkatësisht me 16,9 dhe 2,6 pikë përqindje, krahasuar me vitin 2019.

“Në vitin 2020, numri i udhëtimeve për qëllime personale apo biznesi (brenda apo jashtë Shqipërisë) të kryera nga individët banues në Shqipëri të moshës mbi 15 vjeç ishte 3.212.076. Numri mesatar i netëve të qëndrimit për udhëtime të kryera është 4,6 netë. Udhëtimet për qëllime personale përbëjnë 98,7 % të udhëtimeve gjithsej, ndërsa udhëtimet për qëllime biznesi 1,3 % të tyre. Përqendrimet më të larta të udhëtimeve të kryera janë regjistruar në muajt: Gusht (17,0 %), Janar (12,8 %), Qershor (12,1 %), Dhjetor (11,4 %) dhe Korrik (9,9 %)” thuhet në raportin e INSTAT.

Sipas INSTAT, udhëtimet e gjata në Shqipëri janë kryer më së shumti për “Pushime dhe kohë të lirë” 56,4 %, ndërsa për udhëtimet jashtë vendit 68,2 % e udhëtimeve të gjata janë kryer për “Vizita te të afërm dhe miq”. Udhëtimet e kryera për qëllime biznesi kanë kohëzgjatje të shkurtër në Shqipëri (89,5 %) dhe të gjatë jashtë saj (96,6 %). /atsh/