Avokati Maks Haxhia: Ç’e çoi në burg Saimir Tahirin

Avokati i njohur Maks Haxhia, ish-Kryeprokuror njëherë e një kohë, ka vijuar të reagojë i nervozuar ndaj dënimit të klientit të tij VIP, ish-ministrit Tahiri, aq më tepër duke përfunduar pas hekurave, pasi është i bindur në pafajësinë e tij.

Në Euroneës Albania, Haxhia tha se Tahiri u bë “kokë turku” për t’i treguar Europës se Shqipëria ka bërë një reformë të denjë në drejtësi dhe i ka plotësuar kushtet për t’u integruar në Bashkimin Evropian.

“Reforma që trumbetohet sot kërkon ‘koka turku’. T’i thotë Evropës që futëm ministrin e Brendshëm në burg, do fusim dhe ca të tjerë, që plotësuam kushtin për në BE”, tha avokati i njohur.

Sipas tij, Tahiri i hap rrugë arrestimeve të zyrtarëve të tjerë, pasi siç tha, nëse u dënua Tahiri që është i pafajshëm, atëherë të tjerët do të shkojnë në burg edhe për një firmë.

“Nëse e bëjnë këtë për Tahirin që është i pafajshëm, të tjerë që kanë hedhur edhe një firmë do shkojnë në burg. Se u vendos kufiri në minimum që, kur dënohet ministri i Brendshëm të tjerët nuk do ta diskutojnë dënimin me burg”, tha avokati Maks Haxhia. /sarandacity.al/