Bakojanis, një rrëfim për betejën me kancerin

Ish-ministrja e jashtme greke, firmosës me Bashën e Marrëveshjes Detare të 2009-ës me Shqipërinë, Dora Bakoyannis, foli së fundi për betejën me kancerin.

“Është një sëmundje që luftohet me sukses”, tha ajo, referuar të quajturës “mieloma të shumëfishtë në një fazë shumë të hershme”.

“Jam mirë, po bëj trajtimet e nevojshme. Unë jam më e prekur nga këmba e cila nuk ka lidhje me sëmundjen. E menaxhoj mirë në përgjithësi. Jam shumë mirënjohëse sepse përveç fëmijëve, familjes dhe miqve të mi që janë dhurata më e mirë, një botë e tërë më dërgoi urimet dhe mendoj se një dëshirë e mirë funksionon gjithmonë”, tha Bakojanis, njëherësh ish-kryebashkiake e Athinës.

“Si unë ka 500 gra të tjera çdo vit. Fjala kancer nuk duhet të jetë tabu sepse ka shumë njerëz që kanë kancer dhe po e luftojnë me shumë sukses. Shkenca sot ka bërë hapa të mëdhenj. Kur thashë këtë, erdhën deputete të tjera dhe më thanë se e kanë kaluar edhe ato. Vërtet, nuk e dija. Ka një perceptim në shoqëri që thotë se nuk duhet të flasësh për këtë gjë, veçanërisht nëse je politikane”, tha ajo mes të tjerash.

Aktualisht, Dora Bakojanns është deputete e Nea Demokratia. /sarandacity.al/