“Berisha ka pasur sot, de fakto ditën e fundit politike në Shqipëri”, tha Lulzim Basha në një reagim në mbrëmje, njëherësh duke u treguar gazetarëve dëmet e shkaktuara në seli, edhe në zyrën e tij, si pasojë e dhunës së krahut kundështar.
“Dita e sotme ishte paralajmëruar si ditë sulmi, dhune dhe përplasje mes demokratësh nga Sali Berisha. Ishte paralajmëruar si dita e pushtimit me forcë e selisë së demokratëve.
Ishte paralajmëruar si dita për të kurorëzuar aksionin e tij personal.
Lajmi i mirë është fakti që shumica absolute e demokratëve nuk iu përgjigjën thirrjeve të Berishës për t’u bërë pjesë e skenarit të dhunës. E kanë braktisur siç e kanë bërë gjatë gjithë këtyre muajve”, tha Basha.
Ai përsëriti se “Beteja e Sali Berishës nuk bëhet për askënd, përveç se për atë vetë, dhe ai nuk kursen askënd përveç vetes së tij. Ishte dëshpërimi i një njeriu i cili pati ‘de facto’ ditën e tij të fundit politike në Shqipëri. Asnjë nga objektivat që i kishte vënë vetes nuk u realizua”. /tesheshi.com/
