Shtetet anëtare të BE-së kanë rënë dakord të lehtësojnë rregullat për udhëtimet turistike në bllokun prej 27 anëtarësh për udhëtarët që janë vaksinuar kundër koronavirusit ose janë shëruar nga COVID-19.
Këshilli Evropian rekomandoi që anëtarët e BE-së të heqin të gjitha kërkesat e testimit dhe karantinës për udhëtarët që kanë marrë vaksinat e koronavirusit të miratuara nga BE ose të miratuara nga OBSH nga muaji i ardhshëm.
Pasagjerët që kanë marrë dozën e dytë të vaksinës të paktën 14 ditë ose jo më shumë se 270 ditë para mbërritjes, ose ata që kanë marrë dozën e tretë, do të kenë të drejtë për një vizitë turistike, ashtu si ata pasagjerë që janë shëruar nga COVID-19 brenda 180 ditëve para udhëtimit.
Komisioni Evropian ka mirëpritur udhëzimin jodetyrues, i cili gjithashtu përcakton se testimi ose ndonjë kërkesë shtesë nuk zbatohet për fëmijët nën moshën 6 vjeç të shoqëruar nga një i rritur.
Kushtet e përcaktuara të udhëtimit
Udhëzuesi gjithashtu përcakton kushtet e udhëtimit nga vendet jo-BE në anëtarët e BE-së dhe gjithashtu merr parasysh evolucionin e pandemisë, rritjen e vaksinimit në mbarë botën dhe administrimin e një doze të tretë të vaksinës, tha Komisioni Evropian.
Pasagjerëve që kanë marrë vaksina të miratuara nga OBSH, por nuk janë të autorizuar për përdorim brenda BE-së, mund t’u kërkohet ende të paraqesin një test negativ PCR ose të karantinohen, tha Këshilli Evropian.
Deri më tani, BE-ja ka miratuar vaksinat të zhvilluara nga Pfizer-BioNTech, Moderna, AstraZeneca, Johnson & Johnson dhe Novavax. /sarandacity.al/
