Siç ka luajtur delvinjoti Bujar Hado me ish-Lokomotivën e Durrësit, sigurisht dhe me Butrintin, dhe një ish-lokomotivas ka luajtur në Sarandë. Ai është pikërisht legjenda e portës durrsake, Lad Ajazi, për të gjithë ata që e mbajnë mend atë emër mes shumë emrave të tjerë të kohëve të arta të ekipit durrsak, ku qe mes tyre dhe Hado.
Ndaj, Butrinti i ka kushtuar një dedikim nekrologjik ish-futbollistit që luajti me të ato vite, Vladimir Ajazi, që la këtë botë pas një sëmundjeje nga e cila vuante prej kohësh.
“Lajmi i ndarjes nga jeta të durrsakut Vladimir Ajazi, ka qenë i trishtueshëm edhe për futbollistët e Butrintit. Për arsyen e thjeshtë se emri i tij spikat ndër vlerat e historisë së futbollit sarandiot.
Ajazi luajti vetëm një vit me fanelën e Butrintit, duke mbrojtur në takimet e vitit 1974, portën e ekipit që u bë edhe për atë aq i dashur. Megjithëkëtë, mjafton edhe fare pak kohë për të njohur e vlerësuar njeriun dhe futbollistin që ka mbetur në kujtesën e lojtarëve dhe sidomos trajnerit të kohës, Vangjel Çakuli.
Me Sarandën dhe Butrintin lidhen fillesat e karrierës futbollistike të Vladimir Ajazit, që sot u nda nga jeta. Kjo eksperiencë e parë do t’i shërbente atij për të ngjitur një nga një shkallët e karrierës, duke luajtur në mbrojtje të portës së ekipit Shpresa e më pas të tregojë vlerat njerëzore dhe organizative, si trajner i kombëtares shqiptare.
Ekipi dhe stafi i Butrintit, përmes dhimbjes dhe me shumë nderim për atë kontribut të çmuar që Ajazi dha për ekipin sarandiot, i drejton ngushëllime të sinqerta familjes dhe miqve të shumtë të Vladimir Ajazit”. /sarandacity.al/
