Para parlamentit është organizuar një protestë për Butrintin, kundër dhënies së tij në administrim të Fondacionit Shqiptaro-Amerikan, gjë është kundërshtuar fuqishëm dhe jo thjesht politikisht.
Me pankarta në duar, protestuesit kanë pritur deputetët që shkojnë në Kuvend për seancën e sotme parlamentare, duke iu kërkuar që të tërhiqen nga dhënia me konçension e parkut.
Arkeologu Apollon Baçe thotë se Parku Kombëtar i Butrintit po trajtohet si mall tregu, për shkak se marrëveshja për menaxhimin, u kalua te Komisioni i Ekonmisë dhe jo i Kulturës.
“Dihet që do votohet. Fjalia e vetme që kemi dëgjuar në këtë mes, është kjo që do bëhet si themi ne, ngaqë ne e dimë çfarë bëjmë, ndërsa ne që jemi specialistë nuk e dimë çfarë bëjmë. Duke filluar nga gjëja më e pakët. Butrinti pse duhet të kalojë në Komisionin e Ekonomisë dhe jo atë të Kulturës. Do të thotë që është mall tregu.
Të gjitha ndërtimet që do bëhen aty, jashtë Butrintit, kazinotë, restorantet do bëhen me paratë e popullit. Lekët e mbledhura nga Butrinti do i fusin ata dhe në bazë të marrëveshjes, fondacioni do investojë 0,6% të fitimit vjetor që do ketë. Kemi bëjmë me një akt të pashoq, në krahasim me PPP-të e tjera, është më skandalozi”, theksoi ai.
Sipas Baçes, kjo marrëveshje është skandaloze dhe ndër më të këqijat që qeveria ka bërë.
Ndër parrulla, veçonte dhe ajo që huazon një thënie nga filmi “Lulëkuqe mbi murre”: “Mos u bëj tradhëtor, se pastaj do pendoh(esh)i”. /sarandacity.al/
