Zv.ministrja e Mjedisit dhe Turizmit Ornela Çuci ka komentuar pretendimet për çmime të shtrenjta në lokalet apo restorantet që shërbejnë gjatë sezonit, ku veçon rasti i Ksamilit, ku pati një faturë 300 euro, e cila në fund u zgjidh me paqe mes një austriakeje dhe një pronarit shqiptar.
Për znj. Çuçi, zgjidhja është thjeshtë: mos shko aty ku e sheh që s’e përballon një çmim.
“Jemi të lirë të shkojmë, ose mos shkojmë në një restorant.
Nuk na thotë njeri që ti duhet të shkosh me patjetër aty, ku zotëria në fjalë abuzon me faturën dhe me çmimin. Është një sektor i sapolindur, është një sektor që tani ka hedhur bazat e vërteta.
Secili prej bizneseve dhe individëve që i drejtojnë këto biznese, do të duhet të mendojnë për nesër. Por ti je i lirë që të shkosh aty ku fatura të shkon 250 euro nata, siç je i lirë të shkosh dhe aty ku fatura të shkon 15 euro nata. Dhe Shqipëria i ofron të gjitha këto.
Pra mos të futemi te legjendat urbane që ka fatura jashtë parametrave”, tha ajo për emisionin “Ora Verore”.
Ndërkohë, pyetjes se a “ka shteti akses për të kontrolluar një biznes, që unë mos ta pi birrën në jug 14 mijë lekë të vjetra? E kam pirë para dy javësh”, bërë nga drejtuesi i emisionit, zv.ministrja iu përgjigj:
“Edhe unë do doja që për çdo problemin tim të hap dritaren, t’i drejtohem qeverisë dhe ta shaj.
Do doja shumë ta bëja këtë gjë, gjatë gjithë kohës. Por jo gjithçka varet nga shteti. Qytetarët duhet patjetër ta kuptojnë këtë.
Fatmirësisht Shqipëria ofron shumëllojshmëri çmimesh”. /sarandacity.al/
