Kjo në foto është Saranda e viteve 60-70, me në qendër një njeri të vetmuar që çapitet aty ku sot gëlon jeta e qytetit.
Ndërsa në sfond është Hotel – Turizmi, pra Hotel Butrinti, që ishte për shumë vite pika fundore e qytetit, njëherësh një simbol i tij, sot i shkrirë me dhjetra godina rreth e përqark që duket se ja kanë marrë frymën.
Duket gjithashtu në sfond shëtitorja, e cila ahere nuk kishte konture të qarta të një shëtitoreje klasike, e cila do strukturorej pak më vonë, siç ishte deri para më shumë se një viti, kur nisi të bëhej kjo e reja që është sot.
Madje është mjaft e diskutueshme një nostalgji ndaj së djeshmes dhe në aspektin urban. Zymtësia komuniste ishte plot vraga dhe në skenografinë urbane, me arkitekturën e shëmtuar të pallateve, ku me shumë pak përjashtime kishte oaze të një bukurie estetike.
E sotmja është sigurisht më e zhurrmshme, edhe më kaotike, por dhe me më shumë jetë e zhvillim.
Po kush është ky njeri në këtë foto? Bëhet fjalë për një arsimtar të njohur të atyre viteve, Tahir Zeneli, mësues gjimnazi dhe drejtues arsimit, në Sarandë e Delvinë. /sarandacity.al/
