Deputetja e Sarandës Ina Zhupa u shënjestrua nga kolegia e saj socialiste Spiropali gjatë një debati të nxehtë, si zakonisht, në parlament.
Spiropali thotë se bashkëshorti dhe familjarë të deputetes Zhupa, janë fitues të tenderave nga institucionet shtetërore.
Sipas saj, në këtë rast ata nuk quhen oligarkë por “biznesmenë të ndershëm që ndërtojnë rrugë”.
“Në shtëpi prej xhami mos gjuaj me gurë. Se nuk ka asnjë arsye pse për shembull të themi kur bashkëshorti, familja juaj fiton tendera nuk quhet oligark kurse një biznesmen i nderuar që ndërton rrugë, quhet oligark. Nuk gjej arsye si kur një individ që ndërton aeroporte apo rrugë quhet oligark, dhe kur paguan kunetërit tuaj, quhet biznesmen i nderuar.
Për këto fakte jam përballur edhe në gjykatë, jo me ju por me shefin tuaj. Dhe nuk ka ardhur në gjykatë por ka sjellë kunatin. Me këtë gjuhë, apo sistem pa ide, jo ‘Rama 4’, por kushedi sa Rama do ju ndjekin”, u shpreh Spiropali.
Zhupa u përgjigj duke thënë se s’ka mbajtur asnjëherë ndonjë post qeverisës, ndërsa Spiropali duhet të justifikojë para drejtësisë ‘faturën prej 5 milion euro’.
“Unë e kuptoj shumë mirë që Spiropalit i është tharë goja nga drejtësia, sepse ajo ka një faturë prej 5 milion euro që duhet të justifikojë, ndërsa unë s’kam patur ndonjëherë ndonjë post”, tha Zhupa.
Kujtojmë se ajo ku bashkohen të dy deputetet është zona nga kanë origjinën: Spiropali nga Çorraj e Zhupa nga Fterra. /sarandacity.al/
