Një personazh i PD-së, i parreshtuar me ndonjë nga dy gjysmat e kësaj force, ofroi një shfaqje tipike majtiste këtë të enjte me një akt tipik populist.
Dashnor Sula, deputet i Peqinit, u shfaq te oborri i Kuvendit me një shporte me “produkte shporte”, duke pretenduar se ato ishin të pamundura tashmë për t’u blerë nga populli i thjeshtë.
“Të gjithë kemi detyrën që të bëjmë aq sa kemi në dorë. Kaq kam mundësi, të ngre zërin, por të gjithë qytetarët duhet t’i bëjnë presion kësaj qeverie. I ka mundësitë reale qeveria të bëjë indeksimin e çmimeve.
Kemi rastin e Maqedonisë së Veriut, e cila e ka zeruar TVSH-në për produktet e shportës. Ulet me 14% çmimi i produkteve të shportës që do të thotë se iu ngelen më shumë para në xhep qytetarëve”, ishte arsyetimi i tij.
Tej një debati ekonomik mbi krizën, ajo që bie në sy në këtë rast është majtizmi i theksuar në atë që vetëkonsiderohet forcë e djathtë.
Kujtojmë se komunizmi politik në Shqipëri nisi me Demostratën e Bukës në Korçë në 1940.
“Duam bukë” u shndërrua më pas në kredo të komunistëve shqiptarë.
Ndërkohë, elementi i fortë i djathtë në përmbysjen e komunizmit, në lëvizjen dhjetoriste, ishte mungesa e “bukës” në narrativë, paçka një varfërie të thellë ku e kish çuar regjimi jetesën e popullatës. /tesheshi.com/
