Kryepolici Gledis Nano ka ofruar një pamje te vetes të ngjashme me atë të ish-kuqeziut Kreshnik Spahiu, duke vëzhguar me dylbi një prej detrave të bregdetit shqiptare gjatë një inspektimi për sigurinë në plazhe.
Spahiu nga ana e tij do hidhte vështrimin nga Ksamili drejt Korfuzit për të parë nëse grekët po komplotonin ushtarakisht kundër Shqipërisë, ndodhur kjo aty nga vitet 2012-2013, kur nisi një lëvizje politike me theks nacionalist, të quajtur Aleanca Kuqezi.
Duke iu rikthyer Nanos, ai ishte në zonën e Shëngjinit, ku u takua me vartës lokalë, të cilëve u kërkoi të jenë në lartësinë e detyrës për sigurinë e jetës së pushuesve pas tragjedisë së ndodhur në Himarë.
“Me punën, angazhimin dhe ndershmërinë tuaj keni në dorë jetën e sigurinë e qytetarëve, imazhin e Policisë së Shtetit, si dhe të vendit në tërësi.
Ky është privilegj, po aq edhe përgjegjësi, ndaj mos neglizhoni askënd, cilido qoftë, zbatoni ligjin e vetëm ligjin dhe shërbejuni qytetarëve me përkushtim e humanizëm”, tha Nano.
Kujtojmë se pikërisht një vartës i tij, Arjan Tase, i përlyer në imazh dhe me çështje droge – arrestuar njëherë nën dyshimin e lejimit të mbjelljes së kanabisit në territorin e Bashkisë së Himarës teksa ishte shef rendi – ishte njeriu i rikthyer në Policinë e Shtetit, sërish si shef, që shkaktoi dhe tragjedinë, duke qenë thyes i çdo ligji dhe rregulli. /tesheshi.com/
