Dita dedikuar edukimit: finalizohet konkursi “Edu-Art” në Sarandë

Sot, në Ditën Ndërkombëtare të Edukimit, u shpalos një botë plot me ngjyra, me ide kreative të 158 nxënësve të ciklit 9-vjeçar e të mesëm të shkollave në Bashkinë e Sarandës.

Kjo Bashki, nën kujdesin e posaçëm të Kryetarit Adrian Gurma dhe në partneritet me Zyrën Vendore Arsimore, organizoi konkursin “Edu-Art” në pikturë, ese, vizatim, video sensibilizuese dhe kolazhe.

Punët e paraqitura në këtë Konkurs u publikuan përpara institucionit të Bashkisë në kavaleta, si dhe në hollin e brendshëm, të printuara në formatin 50 x 70 cm. Duke përshëndetur nxënësit, mësuesit dhe prindërit e pranishëm në ceremoninë promovuese të këtij eventi,

Kryebashkiaku Adrian Gurma vlerësoi se me këtë konkurs jemi të gjithë të fituar, pasi morëm dhe dhamë mesazhe të dobishme për edukimin dhe besoj që kemi nxitur krijimin mes shkollarëve tanë. “Çdo ditë është një ditë e mirë për të mësuar”, ishte mesazhi i Kryetarit Gurma, i cili ishte falenderues për secilin nxënës e mësues dhe drejtues shkolle, të përfshirë.

Mes entuziazmit dhe interesit të të pranishmëve, u dorëzuan çmime për 28 punimet e vlerësuara më të realizuara në disa zhanre krijimi. Emocionues ishte angazhimi, si moderator i dhënies së çmimeve, i nxënësit Mateo Minga, nga Qendra për Zhvillim e Bashkisë së Sarandës. Vetë Mateo meritoi Çmimin e Publikut, për videon sensibilizuese me mesazhe të fuqishme për edukim e krijim.

Finalizimi i Konkursit “Edu-Art”, ishte aktiviteti i parë i një zinxhiri veprintarish të programuara për vitin 2022. Në 24 janarin e një viti më parë Bashkia e Sarandës inicoi lëvizjen “Merr një libër, sill një libër”, duke instaluar Shtëpizat e Librit përpara Bashkisë, në shetitoren e restauruar dhe në Ksamil.

Në këtë 24 janar Konkursi “Edu-Art” ishte një tjetër gjetje, me impakt komunitar për edukim e krijim.

Raportuar nga Bashkia Sarandë