Duke parë akuzën e ngritur nga SPAK ndaj ish-ministrit Lefter Koka, është momenti të sillet në kujtesë deklarata e tij e heqjes dorë nga mandati i deputetit, ndodhur kjo në shtator, pak ditë para nisjes së legjislaturës së re parlamentare.
Patjetër që në këtë akt dorëheqjeje, ka patur diçka që lidhet me arrestimin e tij sot, pas kaq muajsh, pasi ishte një akt i beftë që nuk përligjej në raport me afshin e tij politik për të kandiduar më 25 prill, e fituar një mandat deputeti në Durrës.
Ai akuzohet për 3.6 milion euro rryshfet, por në aktin e dorëheqjes thekson me të madhe fjalën “ndershmëri”.
“Dy dekada më parë me përgjegjësi të lartë publike, mora përsipër të garoja për të qenë zëri qytetarëve durrsakë.
Në këtë rrugëtim plot sfida, suksese e padiskutim dhe dështime, pata fatin të dëshmoj fuqinë e besimit, si dhe dinjitetin e njerëzve që punojnë çdo ditë me ndershmëri dhe përkushtim për një të ardhme më të mirë.
Në morinë e sfidave me të cilat ky rrugëtim të përball është gjithmonë e vështirë të ndalesh një moment dhe të vlerësosh se kur është koha e duhur për të mbyllur një cikël.
Sot është dita që rrugëtimin tim politik, ta vijojnë ata mijëra bashkëpunëtorë të mitë, që më bënë fitues për vite me rradhë dhe që mbase nuk kam mundur asnjëherë t’i falenderoj sa duhet. Sot, e ardhmja u përket atyre!
Mirënjohje të madhe për mundësinë, besimin dhe privilegjin e jashtëzakonshëm që më është dhënë t’i shërbej me përkushtim qytetit, vendit dhe njerëzve që dua!
Shqipëria është padyshim sot një vend më i mirë se dje, është vendi plot dritë shprese që na përket të gjithëve”, do thoshte njeriu që, në terma më të thjeshtë, akuzohet si përfitues i 3.6 milion eurove para publike. /tesheshi.com/
