Grabitja e 50.000 eurove në Ksamil nuk është një ngjarje pa dritëhije. Mjaft pikëpyetje mbulojnë dosjen hetimore por edhe atë çka u pasqyrua për opinionin publik.
Kështu, fillimisht rezulton se lajmi është publikuar në media nga një “dorë e panjohur” qysh pasditen e 8 korrikut.
Madje lajmi u publikua me të dhëna të plota, veçse emri Nderim Currit u ngatërrua me atë të Nderim Ndrecës.
Por çuditërisht, në dosjen hetimore rezulton se Prokuroria kishte dhënë masë sigurimi në mungesë për autorët në datën 9 korrik dhe po në atë ditë u ekzekutuan arrestet edhe nga Policia.
Po në datë 9 u shpërnda për mediat edhe komunikata zyrtare.
Ja çfarë thotëë dosja: “Në fazën fillestare të këtij procedimi penal në kuadër të veprimeve hetimore të kryera për këtë procedim penal bazuar në kërkesën e Prokurorit Gjykata e Rrethit Gjyqësor Sarandë nëpërmjet vendimit nr. 54 datë 09.07.2021 ka caktuar masën e sigurimit “arrest në burg”në mungesë parashikuar nga neni 238 i Kodit të Procedurës Penale”.
Po kështu vazhdon edhe citimi për ekzekutimin e vendimit nga policia: “Për ekzekutimin e vendimit nr.54 datë 09.07.2021 të Gjykatës së Rrethit Gjyqësor Sarandë po më datë 09.07.2021 Prokurori ka marrë aktet respektive procedurale “urdhër për ekzekutimin e vendimit të gjykatës për caktimin e masës së sigurimit” me të cilin ka ngarkuar Oficerët e Policisë Gjyqësore në Komisariatin e Policisë Sarandë.
Këta të fundit kanë bërë të mundur të ekzekutojnë vendimin gjyqësor në fjalë dokumentuar me aktet respektivë proceduralë “procesverbal për ekzekutimit të urdhërit të Prokurorit” të datës 09.07.2021 ora 15.00 duke e dërguar çdonjërin prej shtetasve në paraburgim.
Tjetër element i çuditshëm është se në dosjen hetimore thuhet se për procedimin penal 406 të vitit 2021, pra atë të ngjarjes se Ksamilit, janë regjistruar edhe dy vepra të tjera penale, konkretisht: “vetëgjyqësia” dhe “plagosja e lehtë me dashje”, por që siç citon vendimi gjyqësor: “deri në këtë moment nuk i atribuohen ndonjë shtetasi konkret”. Pra mesa duket, në ngjarje ka pasur edhe plagosje e vetëgjyqësi, të cilat nuk janë bërë publike.
Një tjetër element është ai që i dëmtuari L. Poka, në datën 3 korrik ka deklaruar se i ishin grabitur 9500 euro, ndërsa në datën 8 korrik ka thënë se realisht i ishin grabitur 50.000 euro, të cilat i kishte marrë borxh tek një tjetër shtetas në Ksamil.
Ndërkohë, në dosje zbulohet se një nga të arrestuarit, konkretisht Vangjel Pella, ka arritur të marrë në dt.10 korrik një epikrizë përcjellëse nga Spitali Sarandë për në QSUT Tiranë, përfshirë dhe një kartelë 24 orarëshe nga Shërbimi i Urgjencës, duke u transferuar si i paraburgosur në repartin e kardiologjisë Tiranë për shkak të problemeve me zemrën. Me këtë shkak, avokati i tij ka kërkuar masën e sigurisë “detyrim paraqitje” por që edhe Prokuroria edhe Gjykata nuk e pranuan, duke vendosur përfundimisht masëën “Arrest në burg”. /sarandacity.al/
