Dy anije të Forcës Detare shqiptare i janë bashkuar përpjekjeve për shuarjen e zjarrit në tragetin e linjës Brindizi-Gumenicë të përfshirë nga flakët mbrëmjen e djeshme në det.
Lajmi u bë i ditur nga ministri i Mbrojtjes, Niko Peleshi, i cili tha se “fillimisht zjarri ka rënë jashtë ujërave tona territoriale, por tashmë operacioni po kryhet në ujërat tona territoriale, 5 milje larg Porto Palermos”.
Ministri Peleshi u shpreh se “në operacionin që po drejtohet nga pala greke janë angazhuar edhe anijet e Forcës sonë Detare, Butrinti dhe ajo patrulluese R-117”.
Më herët pasagjerët dhe pjesëtarët e ekuipazhit janë evakuuar nga anija.
Trageti i linjës Brindizi-Gumenicë, me 237 pasagjerë dhe 51 anëtarë të ekuipazhit në bord, u përfshi nga flakët teksa po udhëtonte në detin Jon midis portit grek të Igumenicës dhe Brindisit. Pasagjerët dhe anëtarët e ekuipazhit të tragetit ”Grimaldi”, në bordin e të cilit ka shpërthyer zjarri, janë të gjithë të sigurtë në ishullin grek të Korfuzit.
