Një ndërhyrje e thellë po bëhet në Kalanë e Gjirokastrës, më e famshmja në Jug dhe ndër më të famshmet në Shqipëri.
Simboli i qytetit të gurtë, sipas Fondit Shqiptar të Zhvillimit, po merr një trajtim të veçantë mbrojtës ndaj çdo pasoje të mundshme.
“Vijojnë punimet në qytetin e gurtë në kuadër të projektit: ‘Zbatimi i masave paraprake për adresimin e shqetësimeve urgjente për sigurinë dhe parandalimin e humbjes së strukturave të trashëgimisë në Kalanë e Gjirokastrës’, pjesë e ‘Programit për Zhvillimin e Integruar Urban dhe Turizmin’.
Ky projekt financohet nga Banka Botërore dhe zbatohet nga Fondi Shqiptar i Zhvillimit.
Aktualisht në dy zona kanë përfunduar punimet përforcuese me vendosjen e ankerave shkëmbore dhe vendosjen e rrjetave metalike dhe janë duke vazhduar punimet me proceset e gërmimit, pastrimit të inerteve etj.
Puna konsiston në përforcimin dhe konsolidimin e strukturës mbajtëse të kalasë si dhe në ndërhyrjet ruajtëse dhe mbrojtëse për monumentin e kulturës në zbatim të ligjit për trashëgiminë kulturore dhe muzetë (ligji nr 27/2018)”, shkruan FNZH. /sarandacity.al/
