Edhe njëherë për studentët, arsyetimi: pse e kanë “detyrim” vaksinimin

Kreu i Urgjencës Kombëtare, Dr. Skënder Brataj, njëherësh anëtar i Komitetit COVID, tha se veçimi i studentëve nga diskutimi për detyrimin e vaksinimit anti-COVID nuk është i drejtë dhe korrekt. Kjo pasi siç arsyteon ai, nga institucionet është kërkuar vaksinim për të gjithë mbi moshën 18 vjeç dhe edhe studentët duhet të japin kontributin e tyre për të mbrojtur shëndetin e qytetarëve.

Ai u shpreh se vaksinat anti-COVID nuk janë në listën e vaksinave të detyrueshme por këshilla është që të mbrohet shëndeti i të gjithëve.

“Vendimet ose këshillimet e Komiteti të Ekspertëve janë për çdo shqiptar mbi 18 vjeç. Ata kanë të njëjtat detyrime dhe nuk dua t’i ndajë studentët nga pjesa tjetër. Por nuk është detyrim është këshillim. Vaksinat anti-COVID nuk janë në listën e vaksinave të detyrueshme, por ligji i sëmundjeve infektive ka rregulla të caktuara. Jemi akoma në kushte pandemie. Fakti që kemi veçuar studentët nuk është i drejtë, nuk është korrekte, nuk e ka askush me studentët. Duhet të ruajnë shëndetin e tyre. Se kanë një justifikim: ‘Jemi të rinj’ Por ata duhet të mbrojnë familjen e tyre. Kjo u vërtetua në valën e nëntorit dhe janarit, ku humbën jetën shumë prindër dhe të rinj”, tha Brataj për A1 Report.

Duke folur për rolin e vaksinës dhe probabilitetin për t’u infektuar edhe pas saj, kreu i urgjencës tregoi se ajo të mbron nga humbja e jetës dhe nga format më të rënda.

“Të vaksinohesh apo jo, nuk do të thotë që nuk infektohesh. Në fillim u krijua një koncept i gabuar. Në fakt nuk është thënë asnjëherë ashtu. Çdo person që bën vaksinën apo kalon COVID-19, ka një shkallë më të lartë të mbrojtjes, si dhe është provuar në shumë persona se vaksina të mbron rreth 78%  nga humbje e jetës dhe format e renda të koronavirusi”, u shpreh ai. /sarandacity.al/