Kryeministri Rama kujtoi këtë mëngjes punën në frontin e aksit të mezipritur Kardhiq-Delvinë, i cili do “heq qafe” Qafën e sikletshme të Muzinës, duke e bërë Sarandën më të afërt si destinacion për të gjithë ata që e synojnë për pushime. 
“…Dhe me një tjetër vepër të bukur që së shpejti do t’i vihet në shërbim Shqipërisë turistike, siç është Tuneli i Skërficës, përgjatë rrugës së re Kardhiq-Delvinë që do ta afrojë ndjeshëm Sarandën këtë verë, ju uroj një ditë të mbarë”, shkruan i pari i qeverisë.
Është parashikuar e premtuar njëherësh se ky aks do hapet, ndonëse jo plotësisht, në fillim të këtij sezoni. Pra, është fjala për qarkullim njëkalimsh, që, gjykuar nga fluksi që do jetë, nuk do ofrojë komoditetin e nevojshëm në kalim. Kjo, deri sa hapja të jetë e plotë. Kjo hapje është parashikuar për në tetor. /tesheshi.com/
