Familja Dule nga Janjari, takim me vajzën e tyre pas 37 viteve: ç’hoqi në jetimore

Në emisionin e përjavshëm si çdo të dielë te “E Diela Shqiptare”, në rubrikën “Ka një mesazh për ty”, ka qenë protagoniste familja e Uzeir Dules të cilët kërkonin vajzën e lënë në shtëpinë shtetërore të birësimit, para 37 viteve.

Babai Uzeir Dule nga fshati Janjar, së bashku me dy fëmijët e tij ishte paraqitur në këtë emision për të kërkuar vajzën e tij, Afërdita me të cilën humbën kontaktet para 37 viteve.

Afërdita sot quhet Maria Pia Malteze, e cila ka rrëfyer fëmijërinë e saj që ka kaluar në jetimore. Pasi u braktis nga prindërit vetëm 8 muajsh, ajo ka vuajtur në shtëpinë e fëmijës në Vlorë, nuk lahej kurrë, kishte morra dhe nuk ushqehej. Madje shpesh herë ajo dhunohej nga edukatoret. Por kur ishte në moshën 8 vjeç ajo u birësua nga një familje italiane dhe aty ndryshoi jeta e saj përfundimisht.

Maria shprehet: “Mbaj mend gjithashtu në 1991 ndoshta, në ditën më të bukur për mua, Zoti deshi të më jepte një jetë të dytë. Në Tiranë erdhën dy italianë për të birësuar një fëmijë. Për herë të parë edukatoret më lanë, më bënë banjo. Këta dy italianët po na shikonin ne fëmijëve në rresht, nuk e di se çfarë më tërhoqi tek ata dhe shkova unë t’i përqafoja dhe jo ata mua. Babai im u shtang dhe i tha nënës time unë e dua këtë vogëlushe. Nëna ime i tha që jo është e sëmurë, e ka gojën e shtrembër, këmbët e shtrembra dhe babai im i thotë o atë o asnjë. Më zgjodhën mua, isha shumë e lumtur më ndërruan rrobat, vesha rroba të reja”.

Jeta e saj pas vajtjes në Itali ndryshoi rrënjësisht dhe shprehet se është gjallë falë prindërve të saj birësues dhe se do jepte dhe jetën për ta.

Moderatori Ardit Gjebrea i rrëfen historinë e prindërve të saj biologjikë dhe e përlot. Ajo shprehet se mendonte që prindërit i kishte të vdekur dhe ishte fëmijë i vetëm dhe jo të kishte motra dhe vëlla tjetër. Kur u pyet nga Arditi nëse është gati t’i shohë dhe takojë, Maria ngurroi në fillim, u shpreh se kishte frikë, por më pas pranoi.

Maria u shpreh se vëllai dhe motra nuk kishin faj dhe pse ndjen shumë mllef për prindërit që e braktisën. Gjebrea ia shpjegon se e kanë kërkuar gjithë jetën dhe nuk kanë hequr dorë kurrë nga ajo. 38-vjeçarja pranon që t’i takojë, babai vrapon për ta takuar dhe gjatë përqafimit atij i bie të fiktë nga emocionet, por më pas e merr veten. /sarandacity.al/