Tre persona janë arrestuar nga policia në lidhje me grabitjen e ndodhur katër ditë më parë në zyrat e administrimit të Tokës në Vlorë.
Në pranga janë vënë Bardhyl Gjika, drejtor i kësaj zyre i cili denoncoi në media ngjarjen e ndodhur, Kreshnik Mino, 37 vjeç specialist i kësaj drejtorie dhe Spiro Duni 51 vjeç. Të tre këta akuzohen për fallsifikim dokumentash pronësie.
“Pas një hetimi disa mujor, specialistët për Hetimin e Krimeve Ekonomiko-Financiar, nën drejtimin e Prokurorisë së Rrethit Gjyqësor Vlorë, kanë zhvilluar dhe finalizuar operacionin e koduar ‘Formulari’, në kuadër të të cilit u bë ndalimi i shtetasve:
-B. GJ., 60 vjeç, banues në Vlorë.
-K. M., 37 vjeç, banues në Vlorë.
-S. D., 51 vjeç, banues në Himarë.
Nga hetimet ka rezuluat se shtetasi B. Gj, me detyrë Drejtor i Drejtorisë së Administrimit dhe Mbrojtjes së Tokës, pranë Këshillit të Qarkut Vlorë, në bashkëpunim me specialistin e kësaj drejtori shtetasin K. M, dhe shtetasin S. D., dyshohen se kanë falsifikuar formularët e AMTP dhe Formularin nr.6 për regjistrimin e një pasurie (truall), në fshatin Dhërmi”, thuhet në njoftimin zyrtar.
Ky arrestim vjen fill pas një grabitjeje në këtë institicion, ku denoncues qe vetë drejtori i arrestuar tashmë.
Gjika tregoi se si kishte ndodhur grabitja.
“Rreth mesnatës jam njoftuar që kanë hapur zyrat. Një person ka ardhur me mjete të forta dhe ka hapur zyrat. Zyrat e pronave. Gjeta policinë dhe rojet. Po bëjmë një inventar për të parë se çfarë mungon. Është hapur edhe zyra e drejtorisë dhe administrimit të mbrojtjes së tokës.
Nuk kemi për të thënë vjedhje dosjesh sa të mësojmë nëse ka humbur një dokument.
Roja e ka konstatuar dhe ka njoftuar. Ka hyrë nga dritarja te zyra e zëdhënësit dhe pastaj ka dalë nga dera kryesore”, tha drejtori, tashmë nën arrest. /sarandacity.al/
