Kandidati i PS-së për Sarandën, për Lokalet e 14 majit, Olti Çaçi, iu prezantua asamblesë socialiste të degës lokale.
Ai përçoi të parin mesazh publik nga FB, duke shkruar:
“Në Asamblenë e Partisë Socialiste të Sarandës ku ndezim sot motorrët drejt fitores së 14 Majit. Mirënjohje të gjithë kolegëve socialistë për mbështetjen dhe besimin e kandidaturës sime si kryetar i ardhshëm i Bashkisë Sarandë”, shkruan Çaçi, duke e mos diskutuar se do jetë pikërisht ai fituesi më 14 maj.
Ai vijon duke vlerësuar ata që ia besuan këtë mision sfidues në politikë.
“Faleminderit për përkrahjen dhe vlerësimin drejtuesit politik te qarkut, z. Klosi, dhe deputetes sonë Zj. Denaj. Së bashku nisim etapën e re për t’a shndërruar Sarandën në destinacion final të turizmit elitar, një qytet urban modern dhe social dinjitoz për të cilin do të ndihet krenar çdo shqiptar”, shkruan kandidati socialist.
Olti Çaci vjen nga biznesi me theks turistik, ku në Sarandë përfaqësohet me një ndër ndërtimet më estetike, kompleks Flower në hyrje të qytetit. Nëse do kish qenë i shëmtuar, siç janë shumë ndërtime, do kish qenë një minus për të. Fakti që është ndër ndërtimet më të hijshme e sqimtare, është një lloj avantazhi në vizionin e një Sarande të lulëzuar dhe në llojin e të ndërtuarit. /tesheshi.com/
