Pak muaj para nisjes së sezonit, nga dikasteri i linjës njoftohet se së shpejti nis aplikimi për plazhe private. Është ministrja Kumbaro ajo që shkruan se “Bashkë me kolegët e ministrive të tjera shqyrtuam në këtë mbledhje të parë listën dhe hartat e stacioneve të plazheve dhe pas pak ditësh do të hapet sistemi online për subjektet që janë të interesuara të marrin parcela në menaxhim”.
Sipas saj, sistemi do të qëndrojë i hapur në dispozicion për 30 ditë për të pasur një proces transparent, të hapur për të gjithë dhe të pakontestueshëm.
Kumbaro tërhoqi vëmendjen për të gjitha subjektet që do të aplikojnë për stacione plazhesh, që duhet të përmbushin edhe kushtin që të mos jenë debitorë ndaj detyrimeve tatimore qendrore dhe as vendore.
“Me të gjitha ministritë synojmë koordinimin, organizimin dhe cilësinë e shërbimit, sepse qëllimi është të tejkalojmë në numër vizitorësh vitin 2019, që ishte më i miri për Shqipërinë”, shkruan gruaja në krye të Turizmit dhe Mjedisit.
Ky është dhe procesi më delikat i sezonit, mbuluar një vit më parë me hije korrupsioni shtetëror. Si pasojë, pati dhe katër jetëhumbje në Velipojë nga përplasja e dy familjeve, ndërsa u shënuan tensione dhe në Ksamil.
Kujtojmë që një vit më parë, ky proces do drejtohej nga Blendi Klosi, të cilit iu faturuan trazirat në plazhe për shezlongë e çadra, të ndodhur këto kur sezoni kishte nisur. /sarandacity.al/
