Gjirokastër: Gjykatë e Prokurori, të ndarë mbi Kacifasin

Gjykata e Gjirokastrës nuk ka pranuar kërkesën e Prokurorisë së atshme për pushimin e hetimeve për vdekjen e  minoritarit Kostandin Kacifas në fshatin Bularat, ngjarje e ndodhur tre vjet më parë.

Gjykata bën me dije se ka vendosur kthimin e çështjes duke urdhëruar kryerjen e disa veprimeve të tjera hetimore sipas parashikimeve ligjore.

“Në vijim të interesimit të medias për çështjen penale për ngjarjen e datës 28.10.2018 në fshatin Bularat/Dropull, prokuroria pranë Gjykatës së Shkallës së Parë Gjirokastër ju informon se pas kërkesës së prokurorisë për pushimin e çështjes, Gjykata e Rrethit Gjyqësor Gjirokastër, si organi kompetent, ka vendosur kthimin, duke urdhëruar kryerjen e disa veprimeve të tjera hetimore sipas parashikimeve ligjore. Aktualisht çështja ndodhet në fazën e përmbushjes së këtyre detyrimeve”, thuhet në vendim.

Ky vendim vjen pas konkludimit hetimor se 35-vjeçari Kacifas u vetëvra, çka ka sjellë dhe reagimin e fortë të prindërve të të ndjerit, të cilët kanë paralajmëruar të çojnë cështjen në Strasburg. /sarandacity.al/