Trenat rifilluan qarkullimin në Greqi të mërkurën, pas një pauze tre-javore për shkak të aksidentit më të rëndë të trenit në histori të vendit, dhe një ditë pasi kryeministri Kyriakos Mitsotakis njoftoi se zgjedhjet e parakohshme parlamentare do të mbaheshin në maj.
Në pjesë të caktuara të rrjetit hekurudhor janë restauruar linjat kombëtare dhe periferike, është shtuar numri i personelit në trena dhe stacione, si dhe në seksionet më të rrezikshme është theksuar detyrimi për uljen e shpejtësisë.
Trenat në të gjitha linjat do të fillojnë të qarkullojnë më 11 prill, duke përfshirë shërbimin hekurudhor nga Athina në Selanik, qyteti i dytë më i madh i Greqisë.
Në përplasjen mes një treni pasagjerësh dhe mallrash më 28 shkurt, 57 persona humbën jetën dhe dhjetëra u plagosën, nëntë prej të cilëve janë ende në spital.
Kryeministri Mitsotakis, vlerësimet e qeverisë së të cilit ranë pas aksidentit, njoftoi se zgjedhjet do të mbahen në maj, një muaj më vonë se sa pritej, por nuk specifikoi datën e saktë.
Popullariteti në rënie i qeverisë
Zgjedhjet duhet të mbahen deri në korrik, kur skadon mandati i qeverisë aktuale.
Sondazhet tregojnë se qeveria ka humbur pothuajse gjysmën e votuesve të saj që nga aksidenti i trenit dhe aktualisht ka vetëm tre për qind më shumë se rivali i saj kryesor, Syriza e majtë.
Mitsotakis, i cili po përpiqet të rivendosë besimin e votuesve, tha se aksidenti ishte një “tragjedi që nuk duhej të kishte ndodhur”.
“Është e paimagjinueshme që në Greqi në vitin 2023 mund të ketë dy trena që shkojnë në drejtime të kundërta në të njëjtën linjë, pa e vënë re askush. Besoj se njerëzit e kuptojnë se kjo fatkeqësi erdhi si rezultat i një sërë gabimesh të bëra gjatë shumë dekadash. Tani e kemi obligim t’i trajtojmë në mënyrë drastike, ndjejmë përgjegjësi të madhe”, tha Mitsotakis. /sarandacity.al/
