Ministri grek i Shëndetësisë Vassilis Kikilias njoftoi planet për të imponuar kërkesa të reja testimi dhe kufizime për njerëzit e pavaksinuar kundër COVID-19.
Masat përfshijnë kërkimin e testimit javor ose dy herë në javë për punëtorët e pavaksinuar dhe lejimin e qasjes në vende të caktuara të mbyllura vetëm për ata që janë vaksinuar ose kanë një certifikatë që vërteton se janë shëruar nga COVID-19 në gjashtë muajt e fundit.
Ai tha se masat e reja nuk ishin ndëshkuese, por “ajo që duhet të bëjmë si një shtet përgjegjës”.
“Ky është detyrimi ynë ndaj të gjithë atyre që e humbën betejën para se të viheshin në dispozicion vaksinat”, tha Kikilias.
“Është detyrimi ynë ndaj miliona qytetarëve që kaluan 18 muaj të pandemisë duke u kujdesur për veten dhe bashkëqytetarët e tyre, të cilët qëndruan natën deri vonë për javë të tëra duke u kujdesur për pacientët, të cilët mbyllën dyqanet dhe humbën punën dhe punuan apo studiuan në distancë”, shtoi ai.
Masat do të hyjnë në fuqi nga 13 shtatori deri më 31 mars. Sipas rregullave të reja, të gjithë punonjësit e sektorit privat dhe publik pa një certifikatë që vërteton vaksinimin ose shërimin nga COVID-19, duhet t’i nënshtrohen një testi të shpejtë çdo javë, tha Kililias.
Dy teste në javë do të kërkohen për njerëzit që punojnë në akademi, turizëm, restorante, kafene dhe bare, si dhe nxënësit dhe studentët.
Testet do të kushtojnë 10 euro. Vetëm nxënësit do të kenë të drejtë për teste falas.
Duke theksuar se më shumë se 90% e pacientëve me COVID-19 në njësitë e kujdesit intensiv të Greqisë janë të pavaksinuar, Kililias tha se vendet e brendshme të argëtimit, restorantet, baret dhe kafenetë do të jenë të aksesueshme vetëm për klientët e vaksinuar ose të shëruar kohët e fundit, me kontrolle verifikimi të kryera në hyrje përmes një aplikacioni që skanon certifikatat COVID-19.
Njerëzit e pavaksinuar do të jenë në gjendje të hyjnë në kinema, teatro, muze, vende arkeologjike dhe palestra vetëm me prova të një testi të shpejtë negativ të kryer deri në 48 orë më parë. Vendet do të kenë të drejtë të pranojnë vetëm klientët e vaksinuar nëse dëshirojnë, tha ministri.
Maskat do të jenë të detyrueshme për të gjithë në vende të mbyllura publike.
Dëshmia e vaksinimit, shërimit ose një testi të shpejtë negativ brenda 48 orëve të fundit do të kërkohet gjithashtu për të udhëtuar me aeroplan, tren, varkë ose autobuz në distanca të gjata për këdo që është mbi 12 vjeç.
Kikilias gjithashtu theksoi se nuk do të ketë një periudhë shtyrje afati për njoftimin e pezullimit nga puna që nga 1 shtatori për punonjësit e kujdesit shëndetësor që refuzojnë të vaksinohen.
Vaksinat janë falas në Greqi për këdo mbi moshën 12 vjeç.
“Meqenëse tani ekziston një zgjedhje, jeta jonë profesionale, financiare dhe sociale nuk mund të pezullohet dhe ju siguroj se kjo nuk do të ndodhë”, tha Kikilias. /sarandacity.al/
