Adrian Gurma, si ish, përcolli të fundit mesazh në rrjete, pak pasi i dorëzoi detyrën Oltion Çaçit.
“Të dashur miq!
Sot mbyllet për mua një 4-vjeçar intensiv, i bukur, por edhe i vështirë, i mbushur me emocione, sfida e situata jo të zakonshme, të cilat jo vetëm të farkëtojnë guximin, vendosmërinë, durimin por në të njëjtën kohë të pajisin me edukatën e punës, maturinë e dëshirën për të shërbyer, kujdesur e për të qenë i dobishëm”, shkruan ai në nisje të një mesazhi, duke vijuar:
“Pas 4 viteve si Qytetar i Parë, sot i kalova stafetën e drejtimit të Bashkisë Sarandë, kryetarit të ri Oltion Çaçi, duke i uruar mbarësi dhe suksese në detyrën e sapo marrë”.
Gurma përcjell bindjen e një suksesi gjatë ushtrimit të mandatit, duke theksuar “projekte ambicioze”, por pa renditur ndonjë sosh.
“Jam krenar, që kam drejtuar qytetin tim dhe i kam shërbyer bashkëqytearëve, duke realizuar së bashku projekte ambicioze e duke i lënë Sarandës punë të mira e trashëgimi të pasur në çdo fushë, si dhe më shumë ekonomi e turizëm në rritje”.
Duke vijuar me falenderime, për miq e familjarë, Gurma ndalet te ata me të cilët punoi, me bindjen në sukses, si dhe në faktin se katër vitet e drejtimit të Bashkisë i kanë ngritur më shumë etikisht.
“Falenderim, respekt e mirënjohje për të gjithë bashkëpunëtorët e mi, me të cilët arritëm suksesshëm, krah për krah në finishin e këtij rrugëtimi të vështirë, që na bëri më të afërt e më të mirë”, shkruan ish-kryebashkiaku, për ta mbyllur mesazhin me bindjen tjetër, atë të të realizimit të një misioni.
“I privilegjuar, që realizova një detyrë dhe përmbusha një mision!”. /sarandacity.al/
