Në Livadhja, në qendrën kulturore “Katina Papa”, u organizua e para konferencë e pakicave në Shqipëri, me inisiativë të AJMMI-it, OJQ-së më të njohur në Sarandë e themeluar dhe e drejtuar nga gazetari veteran Shkëlqim Hajno, më mbështetjen e Ministrisë së Kulturës.
Përfaqësues të 9 pakicave u gjendën “krahpërkrah”, duke patur në mes atë që u vetëquajt “nëna” e tyre, të shumënjohurën grua të minoritetit, Kostandina Bezhani, e cila që nga viti 2004 drejton Komitetin e Pakicave në Kryeministri.
Në fjalën e saj, znj. Bezhani tha se e njihte mirë këtë fushë, njihte mirë pakicat dhe problematikat e tyre.
Ato janë 9 gjithsej, të njohura me ligj, duke nisur që nga pakica greke, më e madhja në Shqipëri, për të vijuar me atë maqedonase, vllahe, rome, egjiptiane, boshnjake, malazeze dhe serbe.
Përfaqësuesit e tyre në konferencë shprehën konsideratat për znj. Bezhani, duke qenë dakort me vetëcilësimin e saj “nënë” e tyre, njëherësh duke ngritur shqetësime mbi atë çfarë ende nuk shkon në trajtimin e tyre nga shteti.
Në këtë pikë, kritik qe dhe Komisioneri për Mbrojtje nga Diskriminimi, Robert Gajda, i cili tha se në Ligjin për Pakicat të vitit 2017 nuk kanë dalë ende aktet nënligjore. Dhe kjo sipas tij është një çështje problematike.
Gjithsesi, aktiviteti u karakterizua nga një frymë pozitive, ku përfaqësuesit e pakicave patën rastin të njihen me njëri-tjetrin dhe kjo në Livadhja, në një prej qendrave të minoritetit grek në Jug.
Konferenca pati dhe koncert nga grupi i qendrës kulturore të Livadhjasë, një ekspozitë me foto të vjetra nga Dropulli, sjellë nga kjo bashki minoritare e shtrirë në Luginën e Drinos, si dhe një tryezë me gatime tradicionale të zonës. /sarandacity.al/
