I humburi në Vlorë gjendet në Sarandë, babai përlotet kur e sheh

“Pa gjurmë” në A1 Report pasqyroi rastin e një 17-vjeëari nga Vlora, i humbur më 28 nëntor, i cili u gjet në Sarandë.

I ati Festim Pashaj, pasi pa në ekran pamjet e dërguara nga qytetarë dhe një biznes privat në Sarandë, konfirmoi se ai qe i biri i humbur.   

“Ai është. Nuk e di pse e ka bërë. Nga unë është i falur. E presin të gjithë motrat dhe vëllezërit e tij. S’ka pasur arsye për ta bërë këtë gjë. Ndoshta ka frikë të kthehet në shtëpi, pasi është larguar pa leje. Ka qenë shumë i lidhur me ne, me mua veçanërisht. Njerka e tij e ka rritur që 5 ditësh”.

Thuhet se 17-vjeçari u braktis nga nëna biologjike pak ditë pasi erdhi në jetë. Me martesën e dytë të babait ai u rrit nga njerka e tij Marsela Pashaj, e cila ishte ajo që denoncoi e para humbjen e të riut në emision. Nuk dihen arsyet e vërteta pse i riu vendosi të largohej nga banesë papritur, për të përfunduar në qytetin e Sarandës, por babai i tij Festimi e ka një përgjigje edhe për këtë, thuhet nga emisioni “Pa gjurmë”.

I atij sqaroi në emision se “Nëna e vet e la kur ishte 6 ditësh. Ai nuk donte t’ia dinte për nënën biologjike, pasi nuk e ka njohur kurrë. Bashkë kemi punuar muajt e verës në Sarandë. Mesa kemi dijeni ai është takuar me dajën e tij, i cili i ka mbushur mendjen të shkoj tek e ëma. Ajo aktualisht jeton në Sarandë dhe është rimartuar. Djali im nuk ka arsye për të jetuar me nënën e tij biologjike, pasi ajo edhe fëmijët e tjerë i ka nxjerrë në rrugë”. /sarandacity.al/