Dihet që shumë emërtime në kohën e komunizmit ishin me ngarkesë ideologjike. Madje deri në pikën e palidhjes ekstreme, si në rastin e stadiumit kombëtar që quhej “Qemal Stafa”, ndërkohë që heroit i mungonte diçka sportive për aq sa jetoi. Kishte dhe emërtesa gjeografike apo historike gjithashtu.
Por të bën përshtypje që në rast të atyre prodhimeve elektronike vendase (radio dhe televiziorë), emërtesat ishin turistike.
Ndodhte kjo ndërsa mungonte një treg turistik me nevojën e marketimit nëpërmjet produkteve, ku radiot apo televiziorët konsideroheshin dhe luks për një pjesë shqiptarësh. Aq më tepër që nuk ishin as prodhime për eksport, ku pra të marketohej potenciali turistik për të huajt.
Kështu, në mes të viteve ’80 kemi televizorët Lura dhe Butrinti, prodhim i URT Durrës. Ishin prodhim revolucionar, pasi bëhej fjalë për televiziorë me tranzistorë që zëvëndësonin ato me llampa – Adriatik dhe Iliria, të cilat duhej afro 15 minuta që t’u hapej figura. Iliria qe plazh i njohur në Durrës. Gjithashtu, Iliria quhej dhe një radio me tranzistorë, e krijuar sipas modelit të radios së njohur bullgare Milcov.
Më pas do të vinte televizori i parë e ngjyra prodhim shqiptar, me emërtim gjeografiko-turistik. Quhej Riviera. Doli në shitje aty nga viti 1989. U krijua sipas modelit Blaupunkt gjerman.
Ndërkohë, emëra me konotacion ideoligjik në prodhimet elektronike do ishin dy: një radio e quajtur “25-vjetori”, e cila zakonisht gjendej në Berberhane, si dhe një qendër zëri (amplifikatorë), e quajtur “20-vjetori”. /sarandacity.al/
