Ja çfarë e çoi në pranga 40-vjeçarin sarandiot

Policia e Sarandës njofton për arrestimin e një 40-vjeçari që, veç posedimit të farave të kanabisit – periudhë mbjelljesh kjo në ambiente të mbyllura – iu gjetën dhe municion dhe mjete policore.

“Specialistët për Hetimin e Krimeve në Komisariatin e Policisë Sarandë bazuar në informacionet e marra në rrugë operative se një shtetas kishte siguruar fara dhe tentonte për të kultivuar bimë narkotike, kanë ushtruar kontroll në banesën e shtetasit të dyshuar  H. S., 40 vjeç, banues në Sarandë.

Si rezultat i kontrollit  në banesë ju gjetën dhe sekuestruan në cilësinë e provës materiale sasi farash të dyshuara narkotike cannabis sativa, një granatë ofensive së bashku me ndezësin, një radio dhënëse-marrëse me kanalet e Policisë.

Në vijim të veprimeve u bë arrestimi në flagrancë i shtetasit H. S., 40 vjeç, për veprat penale ‘Prodhimi dhe shitja e narkotikëve’, ‘Mbajtja pa leje dhe prodhimi i armëve, armëve shpërthyese dhe i municionit’ dhe ‘Mbajtja pa të drejtë e uniformës’.

Materialet i kaluan Prokurorisë së Rrethit Gjyqësor Sarandë, për veprime të mëtejshme procedural”, thuhet në njoftimin policor. /sarandacity.al/