Policia është detyruar të hyjë në ambientet e një manastiri në Dhermi, diktuar nga një video në rrjete sociale, ku pretendohej se pikërisht aty, në faltoren e krishterë, gjendeshin persona të armatosur.
Por tjetër gja ka rezultuar nga kontrolli, sipas asaj çfarë sqaron Policia.
“Në lidhje me një video të publikuar në rrjetet sociale, ku pretendohet se në Manastirin ‘Burimi Jetëdhënës’, në Dhërmi, qëndrojnë persona të cilët posedojnë armë zjarri, ju sqarojmë se:
Duke vlerësuar videon e publikuar në rrjetet sociale, shërbimet e Komisariatit të Policisë Himarë menjëherë shkuan në këtë manastir, për të verifikuar informacionin.
Gjatë kontrollit në njërin prej ambienteve të këtij manastiri, konkretisht në dhomën e murgut, shtetasit K. M, shërbimet e Policisë gjetën një pistoletë lodër çakmak.
Në vijim të kontrollit të ambienteve të tjera të manastirit nuk u konstatuan sende të jashtëligjshme apo persona të tjerë”, thuhet në njoftimin e Policisë. /sarandacity.al/
