Jahti “i urryer” rus ku ekuipazhi po “mbijeton” me peshk

Ekuipazhi i jahtit të një oligarku rus në Norvegji u detyrua të përdorte peshkimin për të mbijetuar, pasi bizneset lokale refuzuan ta furnizonin me karburant mjetin lundrues, i cili është i palëvizur, tha kapiteni i tij për Wall Street Journal.

Jahti “Ragnar” besohet se i përket Vladimir Strzhalkovsky-t, një ish-agjent i KGB-së me lidhje me presidentin rus Vladimir Putin, i cili u ka shpëtuar sanksioneve.

“Ragnar”-i 85 milionë dollarësh, sipas SuperYacht Fan, ka mbetur i bllokuar në portin norvegjez të Narvik-ut për më shumë se një muaj, sepse furnizuesit e karburantit refuzojnë të punojnë me Strzhalkovsky-n.

Strzhalkovsky nuk është ndër oligarkët rusë të prekur nga sanksionet perëndimore, por furnizuesit norvegjezë të karburantit i thanë transmetuesit publik norvegjez NRK javën e kaluar se nuk donin të ndihmonin entitetet e lidhura me Rusinë.

Shtetet e Bashkuara, Mbretëria e Bashkuar dhe Bashkimi Evropian kanë vendosur sanksione ndaj oligarkëve që besohet se janë “afër” me Putinin, gjë që ka çuar në sekuestrimin e jahteve dhe avionëve privatë.

Në disa vende, njerëzit po protestojnë kundër produkteve dhe subjekteve ruse që nuk janë subjekt i sanksioneve. Punëtorët e portit në MB këtë muaj refuzuan të trajtojnë dërgesat e gazit rus, pavarësisht sanksioneve të Mbretërisë së Bashkuar në atë kohë që lejonin importin e mallrave.

Ndërsa askush nuk është i gatshëm të furnizojë me karburant jahtin, ekuipazhi i “Ragnar”-it po gatuan merluc të freskët, tha për The Journal, Rob Lancaster, kapiteni i jahtit.

 “Ne nuk e kuptuam pse kishte kaq shumë bujë për ne,” tha Lancaster për The Journal. “Kjo ndodhi kaq shpejt.”

Lancaster i tha NRK javën e kaluar se 16 anëtarët e ekuipazhit në bordin e anijes ishin nga vendet perëndimore dhe “nuk kanë asnjë lidhje me pronarin”. /sarandacity.al/