Jo larg Sarandës: pyjet e larta nën magjinë e dëborës

Flokët e dëborës kanë mbuluar ditët e fundit edhe parkun kombëtar “Bredhi i Hotovës – Dangëlli”, i kthyer vitet e fundit në një destinacion turistik për të apasionuarit pas alpinizmit.

Ky park ofron peizazhe fantastike natyrore, me pyje të larta të bredhit të Maqedonisë, peizazhe të mrekullueshme, kanione të mahnitshme, fshatra karakteristike me kulturë dhe histori të lashtë.

Administrata e Zonave të Mbrojtura në Gjirokastër publikoi disa fotografi nga ky park kombëtar, që ndodhet pak kilometra nga qyteti i Përmetit dhe mund të cilësohet si mushkëria natyrore e Shqipërisë Jugore.

“Bardhësi nga zona qendrore e parkut kombëtar ”Bredhi i Hotovës – Dangëlli” dhe Frashëri i historisë”, theksoi ADZM Gjirokastër.

Parku kombëtar ”Bredhi i Hotovës – Dangëlli” është një nga perlat turistike të Shqipërisë, që ofron surpriza të këndshme në çdo stinë të vitit, si në dimër, ku ai është i mbuluar nga dëbora, por dhe në verë ku mund të shijosh freskinë e tij.

Bredhi i Hotovës konsiderohet një nga reliket bimore mesdhetare më të rëndësishme në vend dhe është një nga parqet më të mëdhenj në Ballkan me bredh maqedonas. Por krenaria e këtij parku dhe përfaqësuesi tipik i tij është kaprolli, të cilin mund ta shohësh në livadhe dhe lëndina në thellësi të pyllit. Bredhi i Hotovës është masivi pyjor më i mbrojtur në Shqipëri, duke i rezistuar deri tani çdo dëmtimi apo shpyllëzimi nga njeriu. /atsh/