Këngëtarja e njohur kosovare Shpresa Gashi, duket se e ka zgjidhur me Fiks-in një problem pronësie në Sarandës.
Ajo tregoi në emisionin investigativ se ka blerë një apartament para 7-8 vitesh dhe nuk po e gëzon atë, pasi sipas saj ndërtuesi është penduar që e ka shitur dhe kërkon t’i kthejë paratë. Ndërkohë edhe pse e ka blerë apartamentin ai figuron akoma në emër të ndërtuesit tregon znj. Shpresa.
“Pasi qëndrova tre muaj në apartament, u largova për në Prishtinë, kur u ktheva pas një viti e gjeta të boshatisur apartamentin”, tha Shpresa, duke fajësuar ndërtuesin për këtë gjë.
“Dua vetëm të gëzoj pronën time”, tha këngëtarja për gazetarët e Fiks-it. Këta të fundit, pas intervistës u interesuan në Drejtorinë e Përgjithshme të Kadastrës, e cila autorizoi Agjencinë Shtetërore të Kadastrës Sarandë për një përgjigje të detajuar.
ASHK-ja Sarandë në një përgjigje zyrtare për Fiks-in sqaroi se zonja Shpresa Gashi duhet të paraqitet në Kadastër dhe të bëj aplikim, në mënyrë që të bëhet pronare e apartamentit. Aplikimi duhet të bëhet online me të dhënat që ka kontrata me ndërtuesin.
Për këtë, gazetarët e Fiks-it komunikuan edhe me ndërtuesin, i cili sqaroi se ka vetëm një kontratë porosie me znj. Shpresa, ndaj dhe dokumentet janë në emër të tij në Agjencinë Shtetërore të Kadastrës.
Ai tha se apartamenti është i saj dhe që nesër mund të shkojë të bëjë dhe dokumentet në emër të vet. /Shqip/
