Siç e ka shpallur direktivën kreu i opozitës Basha, në të gjithë qarqet ku PD ka humbur duhet të sillen rastet e atyre që sipas tij përbëjnë “masakër zgjedhore”, një xanxë kjo për rezultatin e 25 prillit, të cilin lidershipi demokrat është përbetuar të mos e njohë.
Po Saranda e Delvina me ç’material duhet t’i përgjigjen kërkesës nga qendra?
Nga Delvina, PD e atyshme nuk ka asnjë rast për të denoncuar, siç të thonë nga kjo degë.
Ndërsa nga Saranda do dërgohet rasti i gjetjes së një kutie me material zgjedhor në Livinë, e cila i përkiste KZAZ-në në Finiq, rastin e pretenduar të lëshimit dhënies së legalizimeve nga Hipoteka gjatë fushatës, si dhe pretendimin se drejtorë institucionesh janë përfshirë në fushatë. Kjo e fundit në fakt ka qenë mëse e qartë.
Vështirësia juridike në këtë rast, në kufijtë e pamundësisë, është vërtetimi arithmetik se sa këto shkelje apo incidente (rasti i Finiqit), kanë ndikuar në rezulatin final, për të shkuar deri në përsëritje zgjedhjesh, siç Basha kërkon.
Në finale, në Sarandë gjithçka ka qenë e qetë, ku madje fundi i numërimit pasoi me një përqafim mes palëve kundërshtare. /sarandacity.al/
