Kokëdhima rishfaqet si klerikal: Kanabisi, i bekuar nga Zoti!

Njeriu që i pari dhe më që së shumti promovoi legalizimin e kanabisit, ish-deputeti Koço Kokëdhima, e shpalli bimën famëkeqe si të bekuar nga Zoti.

“Kanabisi është një bimë e mrekullueshme e bekuar nga Zoti që ka cilësi të jashtëzakonshme”, tha Kokëdhima në një prononcim televiziv, duke marrë kështu rol klerikal në mbrojtje të legalizimit.  “Argumenti për të cilin flasim nuk ka të bëjë me zhvillimin e ekonomisë kriminale. Kanabisi meriton pak vëmendje, nuk është bima e kanabisit kriminale”, argumentoi ai, në kuadër të asaj që mazhoranca aktuale, pjesë e së cilës ishte për një mandat, tashmë, në bazë të një pyetësori drejtuar popullit, do e legalizojë për qëllime mjekësore, pasi ka marrë “ok”.

“Më ka shqetësuar shumë kjo çështje për mënyrën sesi ne i trajtojmë problemet”, tha ai. “Dakord, mund të kemi shumë gjëra që vlejnë në një debat”.

Kokëdhima vijoi duke thënë se “për kanabisin medikal janë dy çështje: E para janë liritë dhe të drejtat e shqiptarëve që ta përdorin për nevojat e tyre shëndetësore. Kjo duhet të jetë e panegociueshme. Ata që e kanë vonuar këtë çështje duhet të kërkojnë falje atyre që kanë pasur nevojë dhe u është mohuar.

A do përfitojë Shqipëria nga ekonomia? Nuk kemi shumë alternativa për të bërë ekonomi. Nuk ka Shqipëria rrugë pa fund, kur ka shanse duhen shfrytëzuar. Nuk kemi sot asnjë ndikim nga industria farmaceutike. Nëse Shqipëria do të ishte e shpejtë. do të merrte pjesë nga ekonomia evropiane e kanabisit farmaceutik”, tha njeriu që sot nuk ka ndonjë rol të caktuar public, veç atij të një ish-i në politikë. /sarandacity.al/